काठमाडौँ, साउन २४ गते । शीर्षस्थानमा रहेको नेपाल पुलिस क्लब ललित स्मृति एन्फा यु–१८ यूथ फुटबल लिगमा मच्छिन्द्र क्लबसँग बराबरीमा रोकिएको छ ।
सातदोबाटोस्थित एन्फा मैदानमा बिहीबार भएको प्रतिस्पर्धात्मक खेलमा पुलिस र मच्छिन्द्रले ३–३ गोलको बराबरी खेल्दै अङ्क बाँडेका हुन् । मच्छिन्द्र सुरुवाती अग्रता जोगाउन नसक्दा अङ्क बाँड्न बाध्य भयो ।
मच्छिन्द्रका लागि पदम तामाङ, प्रशान्त मेन्याङ्बो र रोनिक रानामगरले गोल गर्नुभयो । पुलिसका लागि विक्रम गौतम, कप्तान सुवास बम र सुजलमान घलेले गोल गर्नुभएको थियो । बराबरीसँगै आठ खेलबाट २० अङ्क बनाएको पुलिस शीर्षस्थानमा छ । समान खेलबाट १५ अङ्क बनाएको मच्छिन्द्र चौथो स्थानमा छ ।
