गुणबहादुर रोका
सुलीकोट, साउन २३ गते । गोरखामा माध्यमिक शिक्षा परीक्षा (एसइई ) को ग्रेड वृद्धि परीक्षाको लागि झण्डै २४ सय परीक्षार्थी सहभागी भएका छन् । बुधबारदेखि ३१ गतेसम्म सञ्चालन हुन लागेको एसइई ग्रेड वृद्धि परीक्षाका लागि जिल्ला भरका १३४ माध्यमिक विद्यालयका २४ सय ६५ जना परीक्षार्थीमध्ये २३ सय ६९ जनाले फाराम भरेका जिल्ला शिक्षा तथा समन्वय एकाइ गोरखाका प्रमुख रमेशराज मैनालीले जानकारी दिनुभयो ।
उहाँका अनुसार जिल्ला भर ६६ प्रतिशत एनजी ल्याउनेहरुमा सबैभन्दा बढी जिल्लाभर गणितमा १६ सय र विज्ञानमा १५ सय परीक्षार्थीहरु सहभागी भएका छन् भने अन्य विषयमा निकै कम एनजी ल्याएका उहाँले बताउनुभयो ।
एसइई परीक्षा सञ्चालनका लागि महालक्ष्मी मावि लक्ष्मीबजार, महेन्द्रज्योति मावि पोखरीथोक, शक्ति मावि पाटेचौर, सरस्वती मावि आहाले, भवानी मावि ठाँटीपोखरी र भीमोदय मावि आरुघाट परीक्षा केन्द्र तोकेको उहाँले बताउनुभयो ।
उत्तरी गोरखाको चुमनुब्री गाउँपालिका, धार्चे गाउँपालिका र आरुघाट गाउँपालिकाका जम्मा २३ विद्यालयका ४ सय १६ जना परीक्षार्थीहरुको केन्द्र भिमोदय मावि आरुघाटमा तोकिएको छ ।
त्यस्तै बारपाक सुलीकोट गाउँपालिका, भिमसेन थापा गाउँपालिका र शहिद लखन गाउँपालिका २६ विद्यालयका ४२० जना परीक्षार्थीहरुको केन्द्र गोरखा नगरपालिकाको सरस्वती मावि आहालेमा तोकिएको छ ।
त्यस्तै, पालुङटार नगरपालिका र अजिरकोट गाउँपालिकाका जम्मा २२ विद्यालयका ४२२ परीक्षार्थीहरुको केन्द्र भबनी मावि ठाँटीपोखरीमा केन्द्र तोकिएको छ । गण्डकी गाउँपालिका र सिरानचोक गाउँपालिकाका २७ विद्यालयका ४०७ जना परीक्षार्थीहरुको केन्द्र गोरखा नगरपालिकाको महालक्ष्मी मावि लक्ष्मी बजारमा तोकिएको छ ।
गोरखा नगरपालिकाका २४ विद्यालयका चार सय जना परीक्षार्थीहरु गोरखा नगरपालिकाको महेन्द्र ज्योति मावि पोखरीथोक केन्द्र तोकिएको छ । परीक्षार्थीका लागि तोकिएको परीक्षा केन्द्रमा विद्यार्थी सङ्ख्या बढी भए पछि आरुघाट, पालुङटार, बारपाक सुलीकोट, शहिदलखन र गोरखा नगरपालिकाका १३ विद्यालयका चार सय विद्यार्थीहरुलाई शक्ति मावि पाटेचौरमा केन्द्र तोकिएको जिल्ला शिक्षा समन्वय एकाइ गोरखाले जनाएको छ ।
माध्यमिक शिक्षा परीक्षा एसइईको ग्रेड वृद्धि पूरक परीक्षा आज साउन २३ गते ११ बजेबाट सुरु हुने भएको छ ।
-square-thumb.jpg)
