विपद् प्रतिकार्यलाई प्रभावकारी बनाउन सहायता कक्ष

मनाङ, असार ९ गते । हिमाली जिल्ला मनाङमा विपद् प्रतिकार्यका लागि सहायता कक्ष स्थापना गरिएको छ । जोखिमयुक्त जिल्लासमेत मानिने मनाङको विपद् प्रतिकार्य गर्न पाँच वटा सहायता कक्ष स्थापना गरिएको हो । 

मनसुनजन्य विपद्को समयमा उद्धार र राहतकालाई प्रभावकारी बनाउन सहायक प्रमुख जिल्ला अधिकारी युवराज अर्यालको संयोजकत्वमा जिल्ला विपद् सहायता कक्ष स्थापना गरिएको प्रमुख जिल्ला अधिकारी सुवासकुमार लामिछानेले जानकारी दिनुभयो । उहाँका अनुसार जिल्लामा पाँच वटा विपद् सहायता कक्ष स्थापना गरिएको छ । 

उहाँले भन्नुभयो, “मनाङ बाढीपहिराको जोखिमयुक्त क्षेत्र हो । यहाँ कुनै विपद् आउनासाथ उद्धार र राहतका कार्यलाई प्रभावकारी तथा व्यवस्थित गर्ने भूमिका खेल्नेछ ।” जिल्ला विपद् सहायता कक्ष एक, चार वटा पालिकामा एक÷एक गरी पाँच वटा विपद् सहायता कक्ष स्थापना गरिएको छ । प्रजिअ लामिछानेले जिल्लाका सम्पूर्ण कार्यालयलाई जनशक्ति, उपलब्ध स्रोतसाधन तथा सवारीसाधन विपद्को समयमा परिचालन गर्ने गरी पूर्व तयारी अवस्थामा राख्न निर्देश गरिएको बताउनुभयो । 

वि.सं.२०७८ असार १ मा आएको बाढीपहिराका कारण निजी आवास पूर्णरुपमा क्षति लाभग्राहीलाई राहत उपलब्ध गराउने निर्णय समेत भएको छ । मनसुनजन्य विपदमा परी निजी आवास पूर्णरुपमा क्षति भएका नासो गाउँपालिका-३ निवासी डिमान सिंह गुरुङलाई निजी आवास पुनः निर्माण तथा पुनः स्थापना अनुदान कार्यविधि २०७७ बमोजिम अन्तिम किस्ता बापतको रकम एक लाख ७५ हजार व्यक्तिगत खातामा उपलब्ध गराउने निर्णय गरी कार्यान्वयनको तयारीमा रहेको छ । 

नासो गाउँपालिकाका सम्पूर्ण वडा, चामेका ३, ४, ५ वडा, मनाङ ङिस्याङका १, ४, ५ नम्बर वडामा  वि.सं.२०७८ जेठ १४ र असार १ मा भएको वर्षापछि आएको बाढी पहिराले क्षति पुर्‍याएको थियो । रासस