अनिल पराजुली
हेटौँडा, वैशाख २१ गते । नेपाल कम्युनिष्ट पार्टी (एमाले) मकवानपुरको १२ औं जिल्ला अधिवेशन जेठमा हुने भएको छ । एमाले मकवानपुरका अध्यक्ष एकालाल श्रेष्ठको अध्यक्षतामा शुक्रबार बसेको सचिवालय बैठकले आगामी जेठ १८ र १९ गते अधिवेशन गर्ने निर्णय गरेको हो ।
अधिवेशनको एमाले अध्यक्ष केपी शर्मा ओलीले उद्घाटन गर्ने कार्यक्रम तय भएको एमाले मकवानपुरका जिल्ला सचिवालय सदस्य मदनकुमार दाहालले जानकारी दिनुभयो । अधिवेशनमा मकवानपुरका दश स्थानीय तहका १०२ वटा वडाका प्रतिनिधि र पर्यवेक्षक गरी करिब २ हजार ५ सय जना सहभागी हुने उहाँले बताउनुभयो ।
एमाले पोलिटव्यूरो सदस्य एवम् मकवानपुर जिल्ला इन्चार्ज देबी ज्ञवालीको प्रमुख आतिथ्यतामा बसेको बैठकले अधिवेशन सफल पार्न उपसमिति तोकेर जिम्मेवारी दिएको छ । राजनीतिक तथा सांगठनिक प्रतिवेदन लेखन संयोजकमा एकालाल श्रेष्ठ, मञ्च व्यवस्थापन संयोजकमा लालबहादुर थापा, प्रतिनिधि व्यवस्थापन संयोजक नवीन सिग्देल, अतिथि सत्कार संयोजकमा सीता विष्ट, आर्थिक व्यवस्थापन संयोजक हिदम लामा, प्रचार प्रसार संयोजक ध्रुबप्रसाद चौलागाईलाई दिइएको छ ।
त्यस्तै, आर्थिक प्रतिवेदन, बजेट र कार्ययोजना संयोजक इन्द्र नेपाल, स्वयंसेवक परिचालन संयोजक सुनिल मोक्तान, खाना व्यवस्थापन संयोजक फुर्वा दोर्जे लामा, स्वास्थ्य सेवा समिति संयोजक जुना दहाललाई जिम्मेवारी दिइएको हो ।
