इमानसिं राना
रामपुर (पाल्पा), चैत ३ गते । जिल्लाको निस्दी गाउँपालिका–७ मा जिप दुर्घटना हुँदा एक जना घाइते हुनुभएको छ । निस्दी–६ अर्चलेका ६६ वर्षीय डिलमान राना घाइते हुनुभएको हो ।
शनिबार बिहान निस्दी–६ अर्चलेबाट सर्दीतर्फ जाँदै लु १ ज २३९१ नम्बरको मुस्ताङ जिप भुटुके सर्दी कच्ची सडक खण्डको अधमारामा दुर्घटना भएको थियो । जिप अनियन्त्रित भई सडकमा पल्टिँदा राना घाइते हुनुभएको जिल्ला प्रहरी कार्यालय पाल्पाका प्रहरी निरीक्षक सन्तोष चन्दले जानकारी दिनुभयो ।
घाइतेलाई उपचारका लागि अर्चले स्वास्थ्य चौकी पठाइएको छ । जिपमा १२ जना यात्रु सवार रहेका थिए । जिप चालकलाई नियन्त्रणमा लिई दुर्घटनाको विषयमा अनुसन्धान भइरहेको जिल्ला प्रहरी कार्यालय पाल्पाले जनाएको छ ।
