कन्हैयालाल केशरी
पर्सा, फागुन २९ गते । नेपाल–भारत सीमा नाकाको वीरगन्ज – रक्सौल मितेरी पुलमा भारतीय सुरक्षाकर्मी सीमा सुरक्षा बलको ( एसएसबी ) अस्थायी चेकपोस्ट हटेपछि आवतजावत सहज भएको छ । वीरगन्ज महानगरपालिका भारतीय महावाणिज्य दूतावास वीरगन्ज र ग्रिन सिटी सामुदायिक प्रहरी सेवा केन्द्रको सहकार्य र पहलमा सोमबारदेखि भारतीय सीमा नाकाको मितेरी पुलको दुवै किनारामा रहेको भारतीय सीमा सुरक्षा बलको पोस्ट हटेको जानकारी ग्रिन सिटीका अध्यक्ष जयप्रकाश खेतानले दिनुभएको छ ।
भारतीय सुरक्षाकर्मीले तेस्रो मुलुकका नागरिकको निगरानी र सुरक्षाको कारण देखाउँदै २०८० असोज ३ गतेदेखि मितेरी पुलमा एसएसबीको अस्थायी पाेस्ट खडा गरी चेकजाँचको नाममा दुवै मुलुकका सर्वसाधारण तथा उपभोक्ताहरू चेकजाँचको क्रममा अनावश्यक झमेला र कुटपिट समेत भएको जनगुनासो बढदै गएको थियो । यसै क्रममा फागुन १८ गते एसएसबीका सुरक्षाकर्मीले वीरगन्ज महानगरपालिका वडा नम्बर १ छपकैयाका बलिराम साह सोनारलाई मरणासन्न हुने गरी कुटपिट गरेपछि असहज परिस्थिति बन्दै गएपछि वीरगन्ज महानगरपालिका भारतीय महावाणिज्य दूतावास वीरगन्ज र ग्रिन सिटी सामुदायिक प्रहरी सेवा केन्द्रको सहकार्य र पहलमा सोमबार साँझदेखि भारतीय सीमा नाकाको मितेरी पुलको दुवै किनारामा रहेको अस्थायी चेकजाँच पोस्ट हटेपछि सीमा नाका क्षेत्रमा उत्पन्न अवरोध अन्त्य भएपछि आवागमन सहज हुँदा सर्वसाधारण खुसी भएका छन् ।
समस्या बढ्दै गएपछि शनिबार सीमा सुरक्षा बल हेडक्वार्टर दिल्लीबाट डिआइजी सुरेश सुब्रमण्यको नेतृत्वमा आएको टोलीले वीरगन्जको एक होटेलमा जिल्ला प्रहरी कार्यालय पर्साका प्रमुख प्रहरी उपरीक्षक कुमोध ढुङ्गेल र सामाजिक कार्यमा अग्रणी भूमिका निर्वाह गदैँ आएको ग्रिन सिटी सामुदायिक प्रहरी सेवा केन्द्रका अध्यक्ष जयप्रकाश खेतानसँग बर्ता गरी समस्याको पहिचान गरेपछि सोमबारदेखि आवगमन सहज भएको जानकारी खेतानले दिनुभयो ।
भारतीय महावाणिज्य दूतावास वीरगन्जका कन्सुलर शैलेन्द्र कुमारले सीमा नाकामा भएको प्रत्येक घटनाबारे भारतको केन्द्रीय सरकारलाई समयमै जानकारी गराउँदा समस्याको समाधान सहज रूपमा समयमै भएको बताउनुभयो । वीरगन्ज महानगरपालिकाका नगर प्रमुख राजेशमान सिंहले सुरक्षा चेकजाँचको बहानामा नेपाल–भारतबिचको बहुआयामिक सम्बन्धमा चिसोपन ल्याउने गतिविधिले प्रश्रय पाउने भएपछि उत्पन्न समस्या तत्काल समाधान गर्न भारतीय दूतावासलाई आग्रह गरिएको जानकारी दिनुभयो ।
