मस्को, माघ १० गते । रुसी सेनाको आलोचना फैलाएको अभियोगमा दोषी ठहरिएका कुनै पनि व्यक्तिको धन, सम्पत्ति र मूल्यवान सामान जफत गर्न अधिकारीहरूलाई अनुमति दिने एक विधेयकलाई बुधबार रुसी सांसदहरूले अनुमोदन गरेका छन् ।
सन् २०२२ फेब्रुअरीमा युक्रेनमाथि हमला सुरु गरेलगत्तै मस्कोले आफ्नो सेनाको अपमानलाई अवैध बनाएको छ र त्यसयता द्वन्द्वका हजारौँ विरोधीलाई हिरासतमा राखेको छ ।
तल्लो सदन स्टेट ड्युमाले आफ्नो पहिलो वाचनमा पारित पछिल्लो उपायले असहमतिलाई अझ कठोर बनाएको छ र मुलुक छाडेर भागेका रुसीहरूलाई असर गर्न सक्छ ।
सेनाको बारेमा ‘झुटो सूचना’ फैलाएको आरोपमा पहिला नै अधिकतम १५ वर्षसम्मको कारागार सजायको प्रावधान छ ।
तल्लो सदन स्टेट ड्युमाका सभामुख व्याचेस्लाभ भोलोदिनले बुधबार सांसदहरूसँग उक्त सजाय सेनाका आलोचकहरूलाई रोक्नका लागि ‘पर्याप्त थिएन’ भन्नुभयो ।
“उनीहरू आरामसँग बस्छन्, सम्पत्ति भाडामा दिन्छन्, रुसी नागरिकहरूको मूल्यमा रोयल्टी प्राप्त गरिरहन्छन्, उनीहरू यी कोषलाई नाजी शासनको समर्थन गर्नका लागि प्रयोग गर्छन्”, भोलोदिनले भन्नुभयो, “अपनाइएको निर्णयले हाम्रो देशको सुरक्षाविरुद्ध अपराध गर्ने, हाम्रा नागरिक, सैनिक र अधिकारीहरूको अपमान गर्न सम्भव ठान्ने र नाजीहरूलाई समर्थन गर्नेहरूलाई रोक्नुपर्छ ।”
हालको कानूनअन्तर्गत आधिकारिक सरकारी स्रोतबाट नआउने युक्रेनमा भएको आपत्तिजनक जानकारीलाई ‘झुटो’ मान्न सकिन्छ र यसको प्रसार अभियोगमा मुद्दा लगाउन सकिन्छ । रुसी कट्टरपन्थी अधिकारीहरूले क्रेमलिनको सैन्य हमलाको आलोचना गर्नेलाई ‘देशद्रोही’ भन्दै कानूनलाई कडा बनाउन महिनौँदेखि आह्वान गर्दै आइरहेका थिए ।
रुसको दक्षिणपन्थी एलडिपिआर पार्टीका डेपुटी आन्द्रेई लुगोभोयले भन्नुभयो, “हामीले राम्रो इच्छाशक्ति देखाउँदैछौँ र मात्र दुई वर्षमा यस्तो गरिरहेका छौँ ।” रासस–एएफपी
