वसन्त पराजुली
नारायणगढ, मङ्सिर १६ गते । कवि भूपिनको कविता कृति ‘भूपिनका कविता’ शनिबार विमोचन गरिएको छ । अक्षर समूह चितवनको आयोजनामा भएको कृति सार्वजनिकीकरण कार्यक्रममा चितवनका अग्रज स्रष्टाहरूले पुस्तकको संयुक्तरुपमा विमोचन गर्नुभएको हो ।
कविता सङ्ग्रहमा ५९ वटा समसमाहिक विषयका कविता समावेश गरिएको छ । कक्षा नौको नेपाली पाठ्यक्रममा समावेश गरिएको भूपिनको कविता आमाको तस्बिर कविता पनि समावेश गरिएको छ ।
कार्यक्रममा बोल्नुहुँदै कवि भूपिनले आफ्ना कविता पाठकका बिचमा गएकाले आफू पाठकको प्रतिक्रिया पर्खिएको बताउनुभयो ।
कवितामाथि समीक्षात्मक टिप्पणी राख्नुहुँदै समीक्षक डा. एकनारायण पौड्यालले भूपिनका कवितामा प्रतीक र बिम्ब सशक्त रूपमा आएको बताउनुभयो ।
कार्यक्रममा बोल्नुहुँदै हेटौँडाका कवि निमेष निखिलले भूपिनका कविता युग सुहाउँदो भएको टिप्पणी गर्नुभयो ।
