काठमाडौँ, भदौ १ गते । नेपाली कला क्षेत्रमा निर्माता, गायक तथा अभिनेताका रूपमा सक्रिय विक्रमजङ्ग शाहले नयाँ गीत ‘गर्लफ्रेन्ड छोडेँ मैले’ सार्वजनिक गर्नुभएको छ । यज्ञ विकको शब्द र सङ्गीत रहेको गीत गायनमा विक्रमलाई गायिका टीका पुनले साथ दिनुभएको छ । विनोद बाजुरालीको सङ्गीत संयोजन रहेको गीतको भिडियोमा ‘ब्रेकअपको कन्सेप्ट’ देखाइएको छ ।
प्रेमी र प्रेमिकाबिच असमझदारी उत्पन्न भएपछि टुङ्गिने सम्बन्ध देखाएको गीतको भिडियोमा पल शाह, विजय पुन, विष्णु पुन, यानी पुनलगायतले नृत्य गर्नुभएको छ । गीतको भाव अनुसार नै भिडियो तयार गरिएको गायक विक्रमले बताउनुभयो । विक्रम चौहानको निर्देशन र नृत्य निर्देशनमा तयार भएको गीतको भिडियोमा अर्जुन तिवारीको छायाङ्कन, मिलन विश्वकर्माको सम्पादन रहेको छ ।
