रियलको सहज जित

काठमाडौं, माघ २१ गते । रियल म्याड्रिडले स्पेनिस ला लिगामा भ्यालेन्सियामाथि सहज जित निकालेको छ । घरेलु मैदानमा बिहीबार राति भएको खेलमा रियलले १० खेलाडीमा सिमित भ्यालेन्सियालाई २–० गोलले हरायो ।

रियलको जितमा मार्को असेन्सियो र भिनिसियस जुनियरले गोल गर्नुभयो । दुवै गोल दोस्रो हाफमा सम्भव भएको खेलमा रियलले ५२औं मिनेटमा मार्को असेन्सियोको गोलमा खाता खोलेको थियो । असेन्सियोले भिनिसियस जुनियरको पासमा गोल गर्नुभएको हो । 

त्यसपछि ५४औं मिनेटमा भिनिसियसले कप्तान करिम बेन्जेमाको पासमा गोल गर्दै टोलीको अग्रता दोब्बर बनाउनुभयो । ७२औं मिनेटमा भ्यालेन्सिया १० खेलाडीमा समेटिएको थियो । रियलका भिनिसियस जुनियरलाई फल हानेपछि भ्यालेन्सियाका गाब्रियल पौलिस्टा रातो कार्ड पाउँदै बाहिरिनुभएको थियो ।

त्यसपछि थप गोल नहुँदा रियल सजिलै विजयी भयो । जितसँगै दोस्रो स्थानमा हरेको रियलले १९ खेलबाट ४५ अङ्क बनाएको छ । शीर्षस्थानमा रहेको बार्सिलोनाको ५० अङ्क छ । रियलसँग पराजित भ्यालेन्सिया २० अङ्कसहित १४औं स्थानमा छ । एजेन्सी