केशवचन्द्र महरा
दिपायल, मङ्सिर ६ गते । एउटा मात्रै प्रतिनिधि सभा रहेको डोटीमा सत्ता गठबन्धनका उम्मेदवार प्रेमबहादुर आलेमगर सुरुवातदेखि नै अग्रता लिँदै आउनुभएको छ । पछिल्लो मत परिणामअनुसार उहाँले ३ हजार ३०४ को फराकिलो मतान्तरले अगाडि हुनुहुन्छ ।
प्रतिनिधि सभातर्फको १५ हजार १५८ मत गणना हुँदा उहाँले ८ हजार ३०२ मत प्राप्त गर्नुभएको छ । उहाँका निकटतम प्रतिद्वन्द्वी नेकपा (एमाले) का उम्मेदवार गौरी वलीले ४ हजार ९९८ मत प्राप्त गर्नुभएको छ ।
प्रतिनिधि सभा सदस्यका लागि डोटीमा ६ जना उम्मेदवार रहनुभएको छ । स्वतन्त्र उम्मेदवार नरेन्द्रबहादुर खड्का ६२६ मत ल्याउँदै तेस्रो स्थानमा हुनुहुन्छ भने राप्रपाका अंकबहादुर खड्काले १६५ मत प्राप्त गर्नुभएको छ । त्यस्तै, राष्ट्रिय स्वतन्त्र पार्टीका उम्मेदवार केशव बलायरले ७१ मत प्राप्त गर्नुभएको छ भने अर्का स्वतन्त्र उम्मेदवार राजप्रसाद जोशीले १६ मत प्राप्त गर्नुभएको छ । आले नेकपा (एस) बाट उम्मेदवार हुनुहुन्छ भने नेत्री ओली नेकपा (एमाले) को तर्फबाट उम्मेदवार रहनुभएको छ ।
