रमेश विश्वकर्मा
गुल्मी, असोज २६ गते । आगामी मङ्सिर ४ गते हुन गइरहेको प्रतिनिधिसभा र प्रदेशसभा निर्वाचनका लागि गुल्मीको प्रदेशसभा निर्वाचन क्षेत्र नं. –२ (ख) मा स्वतन्त्र रूपमा उम्मेदवारी दिनुभएका नेपाली काँग्रेसका नेता नरेन्द्रबहादुर अर्यालले उम्मेदवारी फिर्ता लिनुभएको छ ।
सत्तारुढ गठबन्धन दलको तर्फबाट उक्त प्रदेशसभा निर्वाचन क्षेत्रमा उम्मेदवार बन्नुभएका नेकपा (माओवादी केन्द्र) का गुल्मी जिल्ला संयोजक बुद्धिबहादुर घर्ती जिसीलाई समर्थन जनाउँदै अर्यालले आफ्नो उम्मेदवारी फिर्ता लिनुभएको हो ।
समर्थन मात्रै होइन, आफू उहाँलाई जिताउन समेत लाग्ने उहाँले बताउनुभयो । गठबन्धनका सबै उम्मेदवारलाई जिताउन प्रचार–प्रसारमा आफू निरन्तर खट्ने उहाँको भनाइ छ । गठबन्धनका आधिकारिक उम्मेदवार घर्तीलाई समर्थन जनाउँदै उम्मेदवारी उहाँले फिर्ता लिनु भएको क्षेत्र नं. –२ का निर्वाचन अधिकृत शिवबहादुर थापाले जानकारी दिनुभयो ।
