खोलाले बगाउँदा एकको मृत्यु

रेखीराम राना

पाल्पा, असोज २० गते । पाल्पाको रिब्दीकोट –६, ठिमुरेस्थित मन्दीखोलाले बगाएर एक जना बालिकाको मृत्यु भएको छ । मृत्यु हुनेमा रिब्दीकोट –५, नयाँटोल बस्ने पाँच वर्षकी प्रिन्सु पचभैँया रहनुभएको छ ।  

बिहीबार बेलुकी साढे ४ बजेतिर नयाँ टोलबाट रानीठाँटी जाने क्रममा पचभैँयासहित तीन जनालाई खोलाले बगाएको थियो । खोला तर्ने क्रममा प्रिन्सुसँगै आमा कविता र मीना रानालाई खोलाले बगाएको प्रहरीले जनाएको छ । खोलाले बगाएका कविता पचभैँया र मीना रानाको भने उद्धार गरिएको छ । 

जिल्ला प्रहरी कार्यालय पाल्पाका अनुसार मीना घाइते हुनुभएको छ । उहाँको उपचार तानसेनस्थित लुम्बिनी मेडिकल कलेजमा भइरहेको छ । कविता सकुशल रहेको पाल्पाका प्रहरी नायव उपरीक्षक वीरेन्द्र थापाले जानकारी दिनुभयो ।