उद्यमशीलता झल्कने उत्कृष्ट तस्बिरलाई पुरस्कृत गरिने

गाेरखापत्र अनलाइन 

काठमाडौँ, वैशाख १३ गते । गोरखापत्र संस्थानले गोरखापत्र प्रकाशनकाे १२६ औँ वर्ष प्रवेशको अवसरमा उद्यमशीलता झल्कने उत्कृष्ट तस्बिरलाई पुरस्कृत गर्ने घोषणा गरेको छ । आगामी २०८३ वैशाख २४ गते आयोजना हुने विशेष समारोहमा सो पुरस्कार प्रदान गरिने छ ।

वि.सं. १९८४ वैशाख १३ गते गोरखापत्रमा पहिलो पटक १२ वर्षीया सूर्यमती श्रेष्ठनीले चर्खा कातिरहेको तस्बिर प्रकाशित भएको थियो । साे तस्बिर प्रकाशन भएकाे ९९ वर्ष भएकाे छ । उक्त ऐतिहासिक दिनको स्मरण गर्दै र चर्खालाई उद्यमशीलताको प्रतीक मान्दै संस्थानले यो प्रतियोगिताको घोषणा गरेको हो । 

संस्थानमा आबद्ध फोटो पत्रकार तथा ७७ वटै जिल्लाका समाचारदाताले पठाएका उद्यमशीलता झल्कने तस्बिरमध्ये उत्कृष्ट एकलाई २५ हजार नगद पुरस्कारसहित सम्मान गरिने छ ।

गोरखापत्र संस्थानमा आइतबार आयोजित ‘फोटो पत्रकारिता दिवस २०८३’ को उद्घाटन गर्दै संस्थानका कार्यकारी अध्यक्ष गोविन्द (अखण्ड) भण्डारीले सो पुरस्कारको घोषणा गर्नुभएको हो । 

अध्यक्ष भण्डारीले भन्नुभयो, “चर्खा कात्नु उद्यमशीलताको प्रतीक हो र वर्तमान समयमा देशले खोजेको पनि उद्यमशीलता नै हो । त्यसैले गोरखापत्रमा आबद्ध फोटो पत्रकार तथा जिल्ला समाचारदाताबाट तीन–तीन वटा उद्यमशीलता झल्कने तस्बिर माग गरिने छ ।”

उहाँले एउटा तस्बिरले हजार शब्द बोल्ने उल्लेख गर्दै तस्बिर आफैँमा जीवन्त हुनुपर्ने र तस्बिरको क्याप्सन (परिचय)ले त्यसलाई थप अर्थपूर्ण बनाउने बताउनुभयो । नेपालको पत्रकारिता र फोटो पत्रकारिताको विकासमा गोरखापत्रको नेतृत्वदायी भूमिका रहेको चर्चा गर्दै उहाँले यस कार्यले फोटो पत्रकारितालाई अझ समृद्ध बनाउने विश्वास व्यक्त गर्नुभयो ।

गोरखापत्र दैनिकका निमित्त प्रधान सम्पादक जुनारबाबु बस्नेतले उद्यमशीलता सम्बन्धी तस्बिर प्रतियोगितामा संस्थानमा आबद्ध सबै फोटो पत्रकार तथा पत्रकारहरूले सहभागिता जनाउन सक्ने जानकारी दिनुभयो । यस्तै, आर्ट तथा फोटोग्राफी शाखाका प्रमुख केशवराज खनालले गोरखापत्रका ऐतिहासिक तस्बिरको प्रदर्शनीका लागि तयारी भइरहेको बताउनुभयो ।

जयपृथ्वीबहादुरका कृति सङ्ग्रहीत कक्षको उद्घाटन

यसैगरी राष्ट्रिय विभूति तथा गोरखापत्रका संस्थापक मानवतावादी व्यक्तित्व जयपृथ्वीबहादुर सिंहद्वारा लिखित र उहाँका बारेमा लेखिएका पुस्तकहरू सङ्कलन गरी गोरखापत्रको पुस्तकालयमा विशेष कक्ष स्थापना गरिएको छ ।

पुस्तकालयमा छुट्टै स्थान दिइएको उक्त कक्षको आइतबार संस्थानका कार्यकारी अध्यक्ष गोविन्द (अखण्ड) भण्डारी, गोरखापत्र दैनिकका निमित्त प्रधान सम्पादक जुनारबाबु बस्नेत र दी राइजिङ नेपालका निमित्त प्रधान सम्पादक रमेश लम्सालले संयुक्त रूपमा उद्घाटन गर्नुभयो । सो कक्षमा सिंहका कृतिहरूसँगै गोरखापत्रको इतिहाससँग सम्बन्धित अन्य महत्त्वपूर्ण सामग्रीसमेत राखिएका छन् ।

संस्थानको प्रशासन तथा योजना विभागका निर्देशक ताराबहादुर बस्यालले जयपृथ्वीबहादुर सिंहका पुस्तकहरू बजारमा सहजै उपलब्ध नहुने भएकाले उहाँसँग सम्बन्धित सामग्रीहरूलाई एकीकृत गरेर पुस्तकालयमा सुरक्षित गरिएको बताउनुभयो । उक्त कक्षमा सिंहका बारेमा नेपाली र अंग्रेजी दुवै भाषामा लेखिएका ऐतिहासिक पुस्तकहरू सङ्ग्रहीत छन् ।

उहाँलाई नेपाल सरकारले २०७९ असार ६ गते राष्ट्रिय विभूति घोषणा गरेको थियो । सिंहको जन्म १९३४ भदौ ७ गते बझाङको चैनपुरमा भएको थियो । उहाँ तत्कालीन बाइसे राज्यमध्येको एक बझाङका राजा विक्रमबहादुर सिंह र आमा रुद्रकुमारीका जेष्ठ पुत्र हुनुहुन्थ्यो ।