जनार्जन खत्री
सर्लाही, वैशाख १३ गते । मधेश प्रदेश सरकारको ‘एक निर्वाचन क्षेत्र, एक सडक’ अन्तर्गत सर्लाहीको चुरेभेगस्थित बाहुनी–परवानीपुर–घारिबथान सडक कालोपत्रे भएको छ ।
चुरेपाखाको फेदीमा पर्ने लालबन्दी नगरपालिका–११, बाहुनी चोकदेखि सेतीभीर हुँदै लालबन्दी १५ को सतभैया, चिसापानी, परवानीपुर, झरझरा, देउरालीबाट ईश्वरपुर नगरपालिका–१२, घारिबथानसम्मको सडक कालोपत्रे भएको हो ।
पूर्वपश्चिम राजमार्गको विकल्पको रुपमा चुरेपाखा तल कालोपत्रे सडक निर्माण भएसँगै स्थानीय खुसी भएका छन् । अब घारिबथानदेखिका स्थानीयलाई चुरेपाखाको फेदी नै फेदी भएर लालबन्दी बजारसम्म कालोपत्रे सडक हुँदै आउन हुने भएको छ ।
अहिले पूर्वपश्चिम राजमार्ग विस्तारको क्रममा धुलाम्मे रहेकाले घारिबथान, परवानीपुर क्षेत्रका धेरैजसो स्थानीयले लालबन्दी बजारसम्म आउन भर्खरै कालोपत्रे भएको बाहुनी–परवानीपुर–घारिबथान सडक नै प्रयोग गर्न थालेका छन् ।
यही सडक भएर यात्रा गर्नुभएका ईश्वरपुर नगरपालिका–१२, घारिबथानका गणेश बुढाथोकीले विकट क्षेत्रमा पक्की सडक भएसँगै यात्रा गर्न सहज भएको भन्दै खुसी व्यक्त गर्नुभयो ।
चुरेफेदीका गाउँहरुमा क्रमिक रुपमा पक्की सडक पुगेर जनजीवन सहज भए पनि खानेपानी र सिँचाईको असाध्य समस्या भएकाले यसतर्फ पनि ध्यान दिन उहाँले सम्वन्धित निकायलाई आग्रह गर्नुभएको छ ।
लालबन्दी नगरपालिका १५ का वडाध्यक्ष गोरखबहादुर बलले बाहुनी–परवानीपुर–घारिबथान सडक कालोपत्रे भएसँगै चुरेफेदीका गाउँको मुहार फेरिएको बताउनुभयो ।
यसअघि ग्राभेल बाटो रहेको ठाउँमा अहिले पक्की सडक बनेसँगै लालबन्दी बजारसम्म आउन तथा तरकारी र अन्य कृषि उपज बिक्रीका लागि ल्याउन सहज भएको वडाध्यक्ष बलले जानकारी दिनुभयोे ।
वडाध्यक्ष बलका अनुसार बाहुनी चोकदेखि घारिबथानसम्मको सडक खण्ड अन्तर्गत अब लालबन्दी १५ मा पर्ने देउराली डाँडादेखि फूलजोर खोलासम्म करिव ५०० मिटर सडक भने कालोपत्रे हुन बाँकी छ ।
देउराली डाँडाको ओरालोमा सडक साँघुरो रहेकाले त्यहाँ भने अली पछी ढुङ्गाको पर्खाल बनाएर सडक फराकिलो पारेर मात्र कालोपत्रे गरिने वडाध्यक्ष बलले बताउनुभयो ।
यही सडक अन्तर्गत परवानीपुरस्थित कालिन्जोर खोलामा गत वर्ष पक्की पुल निर्माण भइसकेको छ । अब बाँकी रहेको फूलजोर खोलामा पनि पुल निर्माणका लागि प्रक्रिया अघि बढिसकेको पूर्वाधार विकास कार्यालय मलङ्गवाले जनाएको छ ।
मधेश प्रदेश सभा सदस्य बेची लुङ्गेलीले सर्लाही १ (ख) को चुरेभेगका सम्पूर्ण नागरिक लाभान्वित हुने गरी बाहुनी–परवानीपुर–घारिबथान सडक कालोपत्रे गरिएको जानकारी दिनुभयो ।
उहाँले भन्नुभयो–“ऐतिहाँसिक यो सडक कालोपत्रे भएसँगै मेरो निर्वाचन क्षेत्र अन्तर्गत चुरभेगका दर्जनौँ बस्तीका वासिन्दा प्रत्यक्ष लाभान्वित भएका छन् ।”
बाहुनी–परवानीपुर–घारिबथान सडक कालोपत्रेका लागि एस.आर. कन्ष्ट्रक्सन बामगती सर्लाहीले १३ करोड १२ लाख ३७ हजार ५०३ रुपियाँ २३ पैसामा ठेक्का सकार गरेको छ ।
पूर्वाधार विकास कार्यालय मलङ्गवाका प्रमुख एवं सिनियर डिभिजनल इन्जिनियर बिजय यादवका अनुसार भर्खरै कालोपत्रे भएको सडकमा स्पीड लिमिट बोर्ड, पेन्टिङलगायतका केही काम मात्र बाँकी छन् । सिडिई यादवका अनुसार बाहुनी–परवानीपुर–घारिबथान सडक अक्सफाल्ट प्रविधिबाट कालोपत्रे भएको हो ।
-original-thumb.jpg)