ब्रसेल्स, माघ २९ गते । बेलायतले युक्रेनको ऊर्जा र ताप प्रणालीमाथि भइरहेका रुसी आक्रमण रोक्न सहयोग पुर्याउने उद्देश्यले करोडौँ डलर बराबरको हवाई रक्षा प्याकेज घोषणा गरेको छ । बिहीबार गरिएको उक्त प्रतिबद्धताले युद्धग्रस्त युक्रेनको नागरिक पूर्वाधार जोगाउन थप सहयोग पुग्ने अपेक्षा गरिएको छ ।
बेलायती रक्षा मन्त्रालयका अनुसार करिब २० करोड डलर अमेरिकी हतियार खरिदका लागि खर्च गरिनेछ । यो व्यवस्था अमेरिकी राष्ट्रपति डोनाल्ड ट्रम्पद्वारा समर्थित नाटो योजना अन्तर्गत हुने छ । यससँगै लन्डनले ५० करोड डलरभन्दा बढी मूल्यका एक हजार ब्रिटिस निर्मित हल्का मिसाइल किएभ पठाउने निर्णय गरेको जनाएको छ ।
बेलायती रक्षामन्त्री जोन हेलीले युक्रेनका सहयोगी राष्ट्र ‘पहिलेभन्दा बढी प्रतिबद्ध’ रहेको बताउनुभएको छ । उहाँले रुसद्वारा सुरु गरिएको युद्ध पाँचौँ वर्षतर्फ अग्रसर भइरहेका बेला समर्थन झनै सुदृढ बनाउनु पर्ने आवश्यकता औँल्याउनुभएको छ । यो घोषणा नाटोका रक्षामन्त्रीको ब्रसेल्स बैठकपछि आएको हो, जहाँ युक्रेनलाई कसरी थप सैन्य सहयोग गर्ने भन्ने विषयमा विस्तृत छलफल भएको थियो ।
रुसले युक्रेनको ऊर्जा संरचनामाथि तीव्र बमबारी गर्दै आएपछि चिसो जाडोका बिच विभिन्न क्षेत्रमा ताप र बिजुली आपूर्ति अवरुद्ध भएको छ । जर्मनीका रक्षामन्त्री बोरिस पिस्टोरियसले यस अवस्थालाई ‘युक्रेनको नागरिक जनसङ्ख्यामाथिको आतङ्क’ का रूपमा चित्रण गर्नुभएको छ । उहाँले आत्मरक्षाका लागि युक्रेनलाई थप समर्थन अनिवार्य भएको जोड दिनुभएको छ । रासस/एएफपी
-original-thumb.jpg)
