वाशिङ्टन, पुस २८ गते । अमेरिकी राष्ट्रपति डोनाल्ड ट्रम्पले इरानको वर्तमान अवस्थासम्बन्धी विषयमा आफ्नो प्रशासनले विभिन्न सम्भावित विकल्पबारे विचार गरिरहेको बताउनुभएको छ ।
इरानभित्र देखिएका पछिल्ला घटनाक्रम र आन्तरिक परिस्थित सम्बन्धी रिपोर्टको पृष्ठभूमिमा अमेरिकी पक्षले यस विषयलाई गम्भीरतापूर्वक मूल्याङ्कन गरिरहेको उहाँले जानकारी दिनुभयो । आइतबार एयर फोर्स वनमा सञ्चारकर्मीसँग कुरा गर्दै राष्ट्रपति ट्रम्पले भन्नुभयो, “हामी यस विषयलाई अत्यन्त सावधानीपूर्वक अध्ययन गरिरहेका छौँ । अमेरिकी सेनासहित सम्बन्धित निकायले पनि परिस्थितिको मूल्याङ्कन गरिरहेका छन् । उपलब्ध विकल्पबारे उपयुक्त समयमा निर्णय लिइनेछ ।”
उहाँले इरानको आन्तरिक अवस्थाको निरन्तर अनुगमन भइरहेको र त्यसले क्षेत्रीय सुरक्षा तथा अन्तर्राष्ट्रिय स्थिरतामा पार्न सक्ने सम्भावित प्रभावलाई ध्यानमा राखिएको उल्लेख गर्नुभयो । अमेरिकी प्रशासनले कूटनीतिक, राजनीतिक तथा सुरक्षा सम्बन्धी सबै पक्षलाई सन्तुलित रूपमा समीक्षा गरिरहेको जनाइएको छ ।
राष्ट्रपति ट्रम्पले हालसम्म कुनै ठोस निर्णय भइनसकेको स्पष्ट पार्दै परिस्थितिको विकास अनुसार आगामी कदम तय गरिने सङ्केत गर्नुभयो । विश्लेषकका अनुसार, अमेरिका–इरान सम्बन्धमा हुने कुनै पनि परिवर्तनले मध्यपूर्व क्षेत्रको समग्र स्थायित्व र अन्तर्राष्ट्रिय सम्बन्धमा प्रभाव पार्न सक्ने भएकाले विश्व समुदायले यस विषयलाई चासोपूर्वक हेरिरहेको छ ।
अमेरिकी रक्षा मन्त्रालय तथा राष्ट्रिय सुरक्षा निकायले राष्ट्रपति र प्रशासनलाई इरानको अवस्थाबारे नियमित रूपमा जानकारी प्रदान गरिरहेका छन् । आगामी दिनमा अमेरिकी नीतिगत धारणा कस्तो रहनेछ भन्ने विषयमा अन्तर्राष्ट्रिय समुदायको ध्यान केन्द्रित छ । रासस/सिन्ह्वा
