दमौलीमा १५१ समूहद्वारा सांस्कृतिक प्रदर्शन

अमरराज नहर्की

तनहुँ, पुस २५ गते । तनहुँको सदरमुकाम दमौलीमा १३ भन्दा बढी जातजातिको साझा सांस्कृतिक उत्सव सुरु भएको छ । ‘छैटौँ तनहुँ आदिवासी जनजाति सांस्कृतिक महोत्सव’ को अवसरमा १५१ भन्दा बढी सांस्कृतिक समूहले आ–आफ्नो मौलिक पहिचान झल्कने झाँकी र नृत्य प्रदर्शन गरेका छन् ।

नेपाल आदिवासी जनजाति महासङ्घ जिल्ला समन्वय परिषद् तनहुँको आयोजनामा व्यास नगरपालिका –३ खुला मैदानमा बिहीबार सुरु भएको यस महोत्सवले दमौलीलाई जीवन्त सांस्कृतिक सङ्ग्रहालयमा रूपान्तरण गरिदिएको छ । गण्डकी प्रदेशका आर्थिक मामिला मन्त्री डा. टकराज गुरुङले महोत्सवको उद्घाटन गर्नुभएको हो ।

विशाल सांस्कृतिक पदयात्रा र प्रदर्शनी महोत्सवको प्रमुख आकर्षणको रूपमा १३ भन्दा बढी जातजातिका १५१ समूहको उत्साहजनक सहभागिता रहेको थियो । जसमा दुरा, कुसुण्डा, बोटे, दरै, चेपाङ, मगर, गुरुङ, नेवार, कुमाल, तामाङ, भुजेल तथा ब्राह्मण–क्षेत्री समुदायका मौलिक भजन, चुड्का र नृत्यहरू एउटै मञ्चमा गुञ्जिएका छन् ।

महोत्सवका प्रवक्ता जीवन गुरुङका अनुसार सहभागी समूहमध्ये व्यास नगरपालिका –२ को ‘व्यास नगर तमु सुधार आमा समूह’ प्रथम भएको छ । सो समूहले १० हजार रुपियाँ नगद प्राप्त गरेको छ । यस्तै, व्यास नगरपालिका –१ को मगर सुधार समाज द्वितीय (७ हजार ५ सय), मगर गुठी समिति तृतीय (५ हजार) तथा छाङ्गेली नेवा खल र जनभावना नेवा मिसा पुचले सान्त्वना स्थान (२ हजार ५ सय) प्राप्त गरेका छन् । सहभागी सबै १५१ समूहलाई एक हजार रुपियाँ प्रोत्साहन रकम प्रदान गरिएको आयोजकले जनाएको छ ।

पुर्खाको विरासत र मौलिक घर महोत्सव स्थलमा केवल नाचगान मात्र नभइ पुर्खाको जीवनशैली झल्काउने माटोका घर र पुराना कृषि औजारको समेत प्रदर्शनी गरिएको छ । मगर, दरै र कुमाल समुदायका परम्परागत नमुना घरहरूले दर्शकको विशेष ध्यान तानेका छन् । 

सांस्कृतिक घर निर्माण समितिका संयोजक क्याप्टेन सोमबहादुर थापाका अनुसार माटो, बाँस र काठबाट बनेका यी घरभित्र दशकौँ पुराना घरेलु सामग्री, ठेकी, घ्याम्पा र औजारहरू राखिएका छन् । सांस्कृतिक सङ्ग्रहालय बनाउने लक्ष्य महोत्सव मूल समारोह समितिका संयोजक सनम तामाङले मनोरञ्जनभन्दा पनि पहिचानको रक्षा र नयाँ पुस्तामा पुर्खाको संस्कृति हस्तान्तरण गर्नु महोत्सवको उद्देश्य रहेको बताउनुभयो । 

यस्तै, सहसंयोजक सिद्धान्त गर्जा मगरले महोत्सवबाट सङ्कलित आम्दानी आदिवासी जनजातिको जिवन्त सांस्कृतिक सङ्ग्रहालय निर्माणमा खर्च गरिने जानकारी दिनुभयो । माघ ५ गतेसम्म चल्ने यस महोत्सवमा दैनिक रूपमा विभिन्न जातजातिका सांस्कृतिक झाँकी, हस्तकला र भेषभूषाको प्रदर्शनी रहने छ ।