थारू समुदायबाट पहिलो महिला पाइलट

धनगढी समाचारदाता

धनगढी, पुस ११ गते । कैलालीको धनगढी उपमहागरपालिका–१३, कैलाली गाउँका मानबहादुर चौधरीको खेत धनगढी विमानस्थल नजिकै छ । उहाँको खेतमाथिबाट दैनिक हवाईजहाज ओहोरदोहोर गरिरहन्छ । खेतमा काम गर्न जाँदा सधैँ जहाज उडेको हेरिरहने उहाँकी साइँली छोरी टीकाले एक दिन प्रस्ताव राख्नुभयो, “बाबा, म पनि जहाज उडाउने पाइलट बन्छु ।”

छोरीको प्रस्ताव सुनेर केहीबेर त चौधरी अवाक हुनुभयो । त्यसपछि उहाँले पाइलट बन्न धेरै पैसा लाग्ने र त्यस्तो आर्थिक हैसियत आफूहरूको नरहेको भन्दै छोरीलाई सम्झाउनुभयो । त्यति मात्रै हैन, जहाज क्य्रास हुने खतरा धेरै हुने भन्दै उहाँले छोरीको प्रस्ताव टार्न खोज्नुभयो तर टीकाको अनुनयविनय अगाडि उहाँको केही लागेन । 

धनगढीको नास्ट कलेजबाट विज्ञानमा १२ कक्षा उत्तीर्ण गरिसकेकी टीकाले आफू जसरी पनि पाइलट बनिछाड्ने अड्डी कस्नुभयो । “मेहनत म गर्छु, हजुर पैसाको व्यवस्था गर्नूस् भनेर छोरीले जिद्दी गरिन्,” चौधरीले स्मरण गर्नुभयो, “त्यसपछि म पैसाको खोजीमा लागेँ, छोरी पाइलटको तालिमका लागि पठाउने कन्सल्टेन्सीको खोजीमा अगाडि बढिन् ।”

खेतमा जाँदा हवाईजहाज उडेको जमिनबाट हेर्ने २१ वर्षीय टीका चौधरी अब थारू समुदायबाट पहिलो महिला पाइलट बन्नुभएको छ । चौधरीले हालै निजी पाइलटको प्रमाणपत्र प्राप्त गरिसक्नुभएको छ । दक्षिण अफ्रिकाको स्काई हावक एभिएसनमा पाइलटको तालिम गरिरहनुभएकी उहाँले तालिम पूरा हुन भने अझै बाँकी रहेको छ ।  “मेरो तालिम अझै पूरा भइसकेको छैन । तालिम पूरा गर्न दुई सय घण्टा जहाज उडाएको हुनु पर्दछ,” चौधरीले गोरखापत्रसँग भन्नुभयो, “मेरो अझै एक सय घण्टा उडान बाँकी छ । अबको छ महिनामा पूरा हुन्छ ।”

निजी पाइलटको प्रमाणपत्र प्राप्त गरेकालाई एक्लै हवाईजहाज उडाउन मिल्ने गरेको चौधरीले बताउनुभयो । उहाँले मौसम खराब भएमा कहाँ जहाज अवतरण गर्ने भनेर अब आफूले एकल निर्णय गर्न पाउने र आफूले उडाएको जहाजमा आफ्नो बुवासहित दुई जनासम्मलाई बसाउन पाउने बताउनुभयो । “पाइलटको तालिम धेरै नै हार्ड हुने गर्दछ । आकाशमा एक्लै जहाज उडाउनु पर्दछ,” चौधरीले थप्नुभयो, “तर पनि आँटे असम्भव केही पनि छैन । सफलता पाउन सकिन्छ ।”

मानबहादुरका पाँच छोरी र एक छोरा गरेर छ सन्तान छन् । छ सन्तानमध्ये एक छोरीलाई पाइलट बनाउन सकेकोमा गर्व महसुस भएको उहाँको भनाइ छ । यसैबिच थारू समुदायबाट पहिलो महिला पाइलट बनेर इतिहास रचेको र समुदायको इज्जत बढाएको भन्दै बातचित घर धनगढीले टीकालाई बिहीबार सम्मान गरेको छ । सम्मान कार्यक्रममा बातचित घरका बरघरिया ठाकुर करिया प्रधानले टीकाले सिङ्गो थारू समुदायको इज्जत बढाएको भन्दै प्रशंसा गर्नुभयो ।