काठमाडौँ, मङ्सिर २३ गते । नेपाली चलचित्र ‘जेरी अन टप’ ले प्रदर्शनको ५१ औँ दिन पूरा गरेको छ ।
गत असोज ३१ गतेदेखि प्रदर्शन भएको ‘जेरी अन टप’ ले शनिबार सो कोसेढुङ्गा छोएको हो । उक्त चलचित्रले काठमाडौँ उपत्यकामा रहेका क्युएफएक्स सिटी स्क्वाएर, रन्जना सिनेप्लेक्स, वान सिनेमाज नयाँ बानेश्वर र कालीमाटी, एफक्युब चाबहिल र इलाइट सिनेमा इटहरीमा प्रदर्शनको ५१ औँ दिन पूरा गरेको उक्त चलचित्रका वितरक करण श्रेष्ठले जानकारी दिनुभयो ।
“सगरमाथा आरोहण र प्रेमकथामा आधारित चलचित्रले घरेलु बजारमा राम्रो व्यापार गर्नुका साथै दर्शकको ५१ औँ दिनको यात्रा सफलतापूर्वक तय गर्न सफल भएको छ । यो समग्रमा नेपाली चलचित्रकर्मीका लागि सुखद खबर हो । यसको सफलताले विधागत चलचित्र निर्माण गर्न अन्य निर्मातालाई प्रोत्साहन मिलेको छ,” वितरक श्रेष्ठले भन्नुभयो ।
उहाँका अनुसार चलचित्रले १२ करोडभन्दा बढी रकम घरेलु बजारमा व्यापार (ग्रस कलेक्सन) गर्न सफल भएको छ । सरोज न्यौपानेले निर्माण गर्नुभएको उक्त चलचित्रमा अनमोल केसी, आँचल शर्मा, जसिता गुरुङ, केदार घिमिरे, भुवन केसी, उषा खड्गीलगायतका कलाकारले अभिनय गर्नुभएको छ ।
सुयोग गुरुङले निर्देशन गर्नुभएको चलचित्र ‘जेरी अन टप’ यो वर्ष (विसं २०८२) सर्वाधिक व्यापार गर्ने दोस्रो नेपाली चलचित्रसमेत बनेको छ । अभिनेता अनमोल केसीले यो समग्र नेपाली चलचित्र क्षेत्रकै उत्सव भएको बताउनुभयो । “म अहिले नयाँ चलचित्रको छायाङ्कनमा व्यस्त छु, तर पछिल्लो चलचित्रको सफलताले थपेको ऊर्जालाई म शब्दमा व्यक्त गर्न सक्दिनँ । मैले अझै दायित्व बोध गरेर नयाँ काम गर्ने कोसिस गरेको छु । नेपालको सान मानिने सगरमाथाको विषयलाई केन्द्रमा राखेर हामीले प्रेमकथा प्रस्तुत गरेका थियौँ, दर्शकले रुचाउनुभएका कारण आगामी दिनमा अन्य निर्मातालाई पनि प्रकृति र संस्कृतिसँग जोडिएको विषयलाई चलचित्रमा ल्याउन प्रोत्साहन मिल्ने छ,” अभिनेता केसीले भन्नुभयो । काठमाडौँका केही चलचित्र भवनमा ‘जेरी अन टप’ आगामी साता पनि प्रदर्शन हुने निर्माण पक्षले जानकारी दिएको छ । रासस
