काठमाडौँ, मङ्सिर १९ गते । कृषि तथा पशुपक्षी विकासमन्त्री डा.मदनप्रसाद परियार र नेपालका लागि जनवादी गणतन्त्र चीनका राजदूत चेन सङबिच आज द्विपक्षीय भेटवार्ता भएको छ ।
त्यस क्रममा कृषि तथा पशुपक्षी विकासमन्त्री डा. परियारले नेपाल–चीनबिचको दीर्घकालीन मित्रता, विश्वास र सहकार्यलाई कृषि तथा पशुपक्षी विकास क्षेत्रमार्फत अझ गहिरो बनाउन प्रतिबद्धता व्यक्त गर्नु भएको उहाँको सचिवालयले जनाएको छ ।
मन्त्री डा.परियारले आधुनिक, दिगो र जलवायुमैत्री कृषि प्रणाली विकास, उत्पादन वृद्धि तथा द्विपक्षीय व्यापार विस्तारका लागि चीनको प्राविधिक, संस्थागत र व्यापारिक सहकार्य नेपालका लागि महत्त्वपूर्ण रहेको उल्लेख गर्नुभयो ।
विभिन्न प्रोटोकल, अवधारणापत्र तथा सहकार्य संयन्त्रहरूको प्रभावकारी कार्यान्वयनका लागि दुवै देशबिच निरन्तर संवाद र साझेदारी आवश्यक रहेको पनि उहाँले बताउनुभयो ।
मन्त्री डा.परियारले नेपाल–चीन कृषि सहकार्यले नेपाली कृषक, ग्रामीण अर्थतन्त्र र समग्र राष्ट्रिय विकासमा प्रत्यक्ष योगदान पुर्याउने विश्वास नेपाल सरकारले लिएको धारणा राख्नुभयो ।
राजदूत सङले कृषि क्षेत्रमा गर्न सकिने सहकार्य, क्षमता अभिवृद्धि, मिश्रित मल उत्पादन, रोगमुक्त भैँसीको मासु निर्यात र कृषि प्रदर्शन पार्क स्थापनाबारे चीन सकारात्मक रहेको बताउनुभएको थियो ।
दुवै पक्ष प्राविधिक सहयोग, लगानी र ज्ञान आदानप्रदानको महत्त्वमा जोड दिँदै नेपालको कृषि क्षेत्र सुदृढ पार्न र दिगो विकास प्रवर्धन गर्न आवश्यक रहेकामा सहमत भएका छन् । रासस
