राजन रावत
हुम्ला, मङ्सिर १३ गते । नेकपा एमाले हुम्लामा दुई जना एघारौं महाधिवेशन प्रतिनिधि निर्विरोध चयन भएका छन् । प्रतिनिधि छनोटका लागि शुक्रबार भएको उम्मेदवारी दर्तामा एकल मनोनयन दर्ता भएपछि दबै जना निर्विरोध चयन भएका हुन् ।
यसरी निर्विरोध महाधिवेशन प्रतिनिधि चयन हुनेमा एमाले हुम्लाका सचिव तिर्थराज बोहरा र दलित कोटाबाट पर्वत सुनार रहनुभएको एमाले उपाध्यक्ष प्रकाश बहादुर शाहीले बताउनुभयो । अब तीन जना खुल्ला प्रतिनिधिका लागि छ जनाको उम्मेदवारी परेको छ । जसमा जिल्ला अध्यक्ष ज्ञामी बुमी, बिनोद बोहरा, लोकबहादुर हमाल, उपाध्यक्ष प्रकाशबहादुर शाही, पूर्णप्रसाद ढकाल र नवराज महतारा रहनुभएको छ । यसैगरी, एक जना महिला प्रतिनिधिका लागि छ जनाको उम्मेदवारी परेको छ ।
जसमा प्रतिमा रावल, मन्जु रावल, बिमला शाही, रुपा शाही, याङ्जु रोकाया र सौमती ऐडी रहन भएको छ । शनिबार उम्मेदवारी फिर्ताको समय रहेको छ । त्यसमा एक जना महिला, एक जना दलित, एक जना ४० वर्षमुनीको र तीन जना खुल्लाबाट छनोट हुनेछन् । प्रतिनिधि छनोटका लागि दुई हजार १७१ मतदाता रहेका छन् ।
प्रतिनिधिका लागि आकाङ्क्षी बढी देखिएको कारण मतदानबाट टुङ्गाउने सम्भावना बढी रहेको एमाले जनाएको छ । यद्यपि आज (शनिबा) १ बजेसम्म सर्वसम्मत प्रतिनिधि चयनका लागि प्रयास भने जारी राख्ने एमाले हुम्लाका नेताहरुले बताएका छन् ।
