काठमाडौँ, कात्तिक १२ गते। सञ्चार तथा सूचना प्रविधि मन्त्रालयले अनलाइन टेलिभिजनलाई व्यवस्थित र प्रभावकारी बनाउने उद्देश्यले आज मन्त्रालयमा अनलाइन टिटी पत्रकारहरूसँग अन्तर्क्रिया गरेको छ।
मन्त्रालयले पहिलो पटक अनलाइन टिभीका प्रतिनिधिसँग छलफल गरी राय सुझाव लिएको हो। साथै उनीहरूले चौथो पुस्ताको पत्रकारितालाई सुदृढ र सशक्त बनाउनुपर्ने, पेसागत व्यावसायिकता, विश्वसनियता, गुणस्तर र जिम्मेबार बनाउनुपर्नेमा जोड दिएका छन्।
अनलाइन टिभीलाई मूलधारको मिडियाको रूपमा मान्यता दिई राज्यकोतर्फबाट लोककल्याणकारी विज्ञापनलगायत अन्य सहुलियतका लागि पहल गरिदिन मन्त्रालयलाई आग्रह गरिएको छ।
अन्तर्क्रियामा सञ्चारमन्त्री जगदीश खरेलले अनलाइन टिभीलाई नयाँ मूलधारको मिडियाको रूपमा स्थापित गर्न पहल गरिने विश्वास व्यक्त गर्नुभयो। उहाँले अनलाइन टिभीको भूमिका अबको सूचनाको मुख्य माध्यमका रूपमा विस्तार भइरहेको भन्दै सरकारले अनलाइन सञ्चारमाध्यमलाई जिम्मेवार, व्यवस्थित र सशक्त बनाइने विश्वास व्यक्त गर्नुभयो।
सञ्चारमन्त्री खरेलले अनलाइन सञ्चार माध्यमको दर्ता र नवीकरण प्रक्रिया सूचना विभागमार्फत नै हुने गरी व्यवस्था मिलाइएको जानकारी दिनुभयो। मन्त्रिपरिषद् बैठकबाट अनलाइन दर्ता र नवीकरण सम्बन्धी नियमावली पारित भएर केही दिनमै राजपत्रमा प्रकाशित हुने जानकारी दिनुभयो।
सञ्चारमन्त्री खरेलले सरकार नागरिक पत्रकारिता कसरी प्रभावकारी बनाउन सकिन्छ भन्नेमा संवेदनशील भएको र नयाँ मूलधारका माध्यमले सरकारले प्राथमिकतामा राखेको फागुन २१ को निर्वाचनको पक्षमा सूचना सम्प्रेषण गरेर सहयोग गर्न आग्रह गर्नुभयो।
सामाजिक सञ्चाल कहिल्यै बन्द हुँदैन
सरकारका प्रवक्ता समेत रहनुभएका सञ्चारमन्त्री जगदीश खरेलले सामाजिक सञ्जाल कहिल्यै पनि बन्द नहुने र बन्द नगरिने विश्वास व्यक्त गर्नुभएको छ। उहाँले नयाँ मूलधारको मिडिया वा कुनै पनि सञ्चारमाध्यम बन्द हुननहुने स्पष्ट पार्नुभयो।
सञ्चारमन्त्री खरेलले भन्नुभयो,“म सञ्चारमन्त्रीको हैसियतले स्पष्ट पार्न चाहन्छु, सामाजिक सञ्जाल र नयाँ मूलधारको मिडिया कहिल्यै पनि बन्द हुनुहुँदैन र बन्द गरिदने छैन। कुनैपनि प्रकारका मिडिया बन्द गरिनु हुँदैन र त्यस्तो हुने छैन।”
मन्त्री खरेलले सामाजिक सञ्जाल व्यवस्थित र जिम्मेवार बनाउनुपर्छ र सबै जिम्मेवार बन्नुपर्छ भन्ने सरकारको धारणा रहेको स्पष्ट पार्नुभयो। उहाँले नयाँ मूलधारका मिडियाका प्रतिनिधिलाई तालिमका लागि मन्त्रालयले पहल गर्ने विश्वास व्यक्त गर्नुभयो।
अन्तर्क्रियामा अनलाइन टिभी सङ्घका अध्यक्ष जीवन भण्डारीले अनलाइन टिभीलाई सरकारले लोक–कल्याणकारी विज्ञापन दिनुपर्नेमा जोड दिनुभयो। उहाँले अनलाइन टिभीलाई व्यवस्थित गर्न सूचीकरण, पत्रकार प्रशिक्षण, डिजिटल साक्षरता अभियान तथा सामाजिक सुरक्षाका लागि पहल गरिदिन आग्रह गर्नुभयो।
लोकसञ्चारकर्मी सङ्घका अध्यक्ष चन्द्रमणि गौतमले लोकसञ्चारकर्मीले सम्पूर्ण लोकका लागि पत्रकारिता गर्दै आएको र मुलुकको धार्मिक, सांस्कृतिक पर्यटनका लागि कलम चलाउँदै आएको जानकारी दिनुभयो।
उहाँले डिजिटल सञ्चारको नियमन र प्रवर्धनमा प्रभावकारी काम गरिनुपर्नेमा जोड दिनुभयो। डिजिटल मिडिया अलाइन्सका उपाध्यक्ष मोनिका सिंहले अनलाइन मिडियालाई मूलधारका मिडिया सरह सहुलियत र व्यवस्थित गर्न जरुरी भएको बताउनुभयो।
अन्तर्क्रियामा पत्रकारहरूले अनलाइन टिभीलाई प्राथमिकता दिएर सरोकारका विषयमा छलफल र सुझाव लिएकोमा सञ्चारमन्त्रीलाई धन्यवाद दिएका छन्। कार्यक्रममा अनलाइन टिभी पत्रकार सङ्घ र राष्ट्रिय लोकसञ्चारकर्मी सङ्घलगायत विभिन्न अनलाइन टिभीमा आबद्ध पत्रकारको सहभागिता थियो।
