टोकियो, कात्तिक ११ गते । जापानमा आर्थिक वर्ष सन् २०२५ मा भालु आक्रमणका कारण मृत्यु हुनेको सङ्ख्या दश जना पुगेको रेकर्ड गरिएको छ । पछिल्लो समयमा जापानमा भालुसँग सम्बन्धित घटनामा वृद्धि भएको वातावरण मन्त्रालयले जनाएको छ ।
चालु आर्थिक वर्षमा अहिलेसम्म भालु आक्रमणमा एक सयभन्दा बढी मानिस परेका छन् । भालु आक्रमणका कारण मृत्यु हुनेको सङ्ख्या आर्थिक वर्ष सन् २००६ बाट रेकर्ड राख्न सुरु गरिएकोमा सबैभन्दा बढी पछिल्लो वर्षमा रहेको मन्त्रालयले जनाएको छ । पछिल्लो घटना गत शुक्रबार उत्तरपूर्वी जापानको अकिता प्रान्तको एउटा गाउँमा भालुले ३८ वर्षीय व्यक्तिलाई आक्रमण गरी मारेको थियो ।
अकिता प्रान्तमा बासिन्दालाई भालुको आक्रमणबाट मानिसलाई जोगाउन सेनाको सहयोगको आह्वानसमेत गरिएको छ । आक्रमणको अवस्था प्रान्तीय तथा स्थानीय सरकारले नियन्त्रण गर्न नसक्ने स्थितिमा पुगेको गभर्नर केन्टा सुजुकीले सामाजिक सञ्जालमार्फत जनाउनुभएको छ । छिमेकी प्रान्त इवाटेमा अप्रिलदेखि ३० जनाभन्दा बढी मानिस भालुकाे आक्रमणमा परेको जनाइएको छ । रासस/सिन्ह्वा
