शेरबहादुर सार्की
बाजुरा, कात्तिक १० गते । बाजुराको उच्च हिमाली क्षेत्रमा चिसो बढेसँगै हिमाली गाउँपालिका विच्छ्या रुगिनका बाढी पहिरोपीडित चिन्तित भएका छन् ।
गत साउन २८ गते राति विच्छ्या खोलामा आएको बाढीले यहाँका वडा नं –१ विच्छ्या र –५ रुगिनका करिब ४१ घरपरिवार विस्थापित भएपछि अहिले उनीहरु त्रिपालको बासमा छन् ।
गर्मी समयमा पनि चिसो हुने यो ठाउँमा हिउँदमा कसरी त्रिपालको बास गर्ने होला भन्ने चिन्ता यतिबेला उनीहरुमा छ ।
हिउँदको महिना यहाँ धेरै चिसो हुन्छ । यो चिसोमा बालबच्चा कसरी त्रिपालमा राखेर बस्ने अहिले निकै डर लाग्न थालेको हिमाली गाउँपालिका वडा नं – १ विच्छ्याका सब्बले थापाले बताउनुभयो ।
उहाँले भन्नुभयो, “बर्खाको समय त अलि चिसो कम हुन्थ्यो । त्यो बेलामा त जसोतसो गरी त्रिपालमै गुजारा गरेर बस्यौ । अब यतिबेला चिसो बढ्न सुरु भयो, यो चिसोमा कसरी यत्रो जवान परिवार बास बस्ने निकै चिन्ता लागेको छ ।”
जसरी यहाँको स्थानीय सरकारले अहिलेसम्म खाद्यान्न लुगा कपडा लगायतका राहत सामग्री सहयोग गरेको छ, त्यसैगरी प्रदेश र सङ्घीय सरकारले पनि कतै घरबासको व्यवस्था गरिदिए चिसोको बेलामा बास बस्न सहज हुने थापाले बताउनुभयो ।
बाढीपहिरोले हिमाली गाउँपालिका वडा नं – १ विच्छ्यामा ८ घर बगाएको र नौ घर पूर्ण जोखिममा परेका छन् भने यहाँको वडा नं – ५ कवाडीमा पनि १६ घर बगाएको र ३२ घरमा पूर्ण क्षति भएका छन् । यहाँका सबै २४ घर विस्थापित र ४१ घर पूर्णरुपमा क्षति भएको थियो ।
हामीसँग जती सहयोग गर्ने क्षमता थियो, त्यो सहयोग गरेका छौ । अहिले यहाँका स्थानीयलाई चाहिएको भनेको घरबास हो । घरबासका लागि धेरै ठुलो रकम चाहिन्छ । त्यो रकम प्रदेश र सङ्घीय सरकारलाई माग गरेको हिमाली गाउँपालिका अध्यक्ष गोविन्द्रबहादुर मल्लले बताउनुभयो ।
उहाँले भन्नुभयो, “हामीले साउन २९ गते नै विच्छ्या र ३० गते कवाडीका बाढीपहिरो पीडितलाई चामल नुन तेल त्रिपाल वितरण गरेको हो ।”
दुई चार परिवार भए त केही गर्न सहज हुन्थ्यो । यहाँ पूरै गाउँ नै विस्थापित भएका छन् । हामीसँग ठुलो रकम नभएकाले यहाँका बाढी पहिरोपीडितलाई घरबासको व्यवस्था गर्न समस्या भएको मल्लले बताउनुभयो ।
बाजुरामा अहिलेमा नभई पहिलाका पनि धेरै घर परिवारहरु विस्थापित भएका छन् । केहीलाई घरबासको व्यवस्था भयो भने अन्य परिवारलाई भने अझै केही गर्न सकेको छैन ।
ती परिवारलाई घरबासको व्यवस्था गर्नका लागि हामीले जिल्ला विपद् व्यवस्थापन समितिको बैठक बसालेर यहाँका गृह मन्त्रालयमा पत्राचार गरेको प्रमुख जिल्ला अधिकारी गणेशप्रसाद पौडेलले बताउनुभयो ।
