जयकृष्ण यादव
इनरुवा, कात्तिक ११ गते । सुनसरीको इनरुवासहितका विभिन्न स्थानमा हर्षोल्लासका साथ उदाउँदो सूर्यलाई अर्घ दिँदै छठपर्व सम्पन्न भएको छ । शनिबार नुहाएर खाएपछि सुरु भएको आस्थाको पर्व मङ्गलबार बिहान उदाउँदो सूर्यलाई अर्घ दिँदै हर्षोल्लासका साथ छठपर्व सम्पन्न भएको हो ।
यस छठ पर्वको चौथो दिन मङ्गलबार बिहान इनरुवाका विभिन्न जलाशयमा उदाउँदो सूर्यलाई अर्घ अर्पण गर्दै छठपर्व सम्पन्न भएको जनाएको छ ।
सुनसरीको इनरुवा नगरपालिका १ र ५ बलाहा नहर घाट, इनरुवा २ राजाजी घाट, ३ र ६ मधेशा, इनरुवा ९ बबिया, १० जल्पापुरसहितको शङ्करपुर शाखा नहर घाटसहितको २०० बढी स्थानका घाटमा दुई लाखभन्दा बढीले हर्षोल्लासका साथ छठपर्व सम्पन्न गरेका छन् ।
यहाँका दलित गैर दलित र हिन्दू सहितको गैर हिन्दूसहितको सहभागिता हर्षोल्लासका साथ छठपर्व सम्पन्न भएको स्थानीय पण्डित बलराम यादवले जानकारी दिनुभयो ।
पारिवारिक सुख, शान्ति, समृद्धि, रोगबाट मुक्ति तथा मनोकाङ्क्षा पूरा हुने जनविश्वासका साथ श्रद्धापूर्वक छठ मनाइएको यादवले जानकारी दिनुभयो । छठका अवसरमा वर्षे ताल, भुटाहा पोखरी, देशको सबैभन्दा ठुलो नदी सप्तकोशी, कोशी कटान, जमुवा, लौकही राजा पोखरीमा, सुनसरी मोरङ सिँचाइ योजना नहर, हरिपुर, शिसुवा, शंकरपुर, सीतागञ्ज, रामगञ्ज शाखा नहर र विभिन्न जलाशयमा श्रद्धालु भक्तजनको भीड लागेको थियो । सोमबार साँझ व्रतालुले अस्ताउँदो सूर्यलाई अर्घ दिएर मङ्गलबार बिहान उदाउँदाे सूर्यलाई अर्घ दिएर सम्पन्न गरेको हो ।
यसैबिच तराइको दलित समुदायको मरिकले समेत गैर दलित समुदायसँगै छठको घाट बनाएर हर्षोल्लासका साथ छठपर्व मनाएका इनरुवा २ का रन्जित मेहताले जानकारी दिनुभयो ।
कुनै भेदभाव र छुवाछूत विना हर्षोल्लासका साथ छठपर्व मनाएको इनरुवा २ का रामा मरिकले जानकारी दिनुभयो । मरिकले दशक अघिसम्म आफ्नो घर अगाडि एक्लै छठपर्व मनाएको अनुभव सुनाउनु हुँदै अहिले सबै एउटा घाटमा सँगै हर्षोल्लासका साथ छठपर्व मनाएको खुशीसमेत सुनाउनुभयो ।
