पूर्व राष्ट्रपति बोल्सोनारोको विद्रोह प्रकरणमा सात जनालाई लामो जेल सजाय

ब्रासिलिया, कात्तिक ५ गते । ब्राजिलको सर्वोच्च अदालतले पूर्व राष्ट्रपति जाइर बोल्सोनारोको नेतृत्वमा भएको विद्रोह प्रयाससम्बन्धी मुद्दामा सात जनालाई मङ्गलबार १७ वर्षसम्मको जेल सजाय सुनाएको छ ।

यसअघि सेप्टेम्बरमा अदालतले सन् २०२२ को चुनावमा वामपन्थी नेता लुइज इनासियो लुला दा सिल्भासँग पराजित भएपछि भएको असफल कू प्रयासमा बोल्सोनारोलाई दोषी ठहर गर्दै २७ वर्षको कैद सजाय सुनाएको थियो । त्यसै मुद्दामा उहाँका सातजना वरिष्ठ पूर्व सहयोगीहरू पनि दोषी ठहरिएका थिए ।

यो प्रकरणले वासिङ्टनसँग कूटनीतिक तनाव सिर्जना गरेको छ । अमेरिकी राष्ट्रपति डोनाल्ड ट्रम्पले ब्राजिलका अधिकारीले आफ्ना पुराना सहयोगी बोल्सोनारोविरुद्ध ‘राजनीतिक प्रतिशोध साँध्ने’ काम गरिरहेको आरोप लगाउँदै ब्राजिलका उत्पादनमा उच्च भन्सार शुल्क लगाएको दाबी गर्नु भएको छ ।

मङ्गलबारको फैसलामा अदालतले एक सङ्घीय प्रहरी अधिकारी, पाँच जना सैनिक र स्वतन्त्र चुनावी लेखापरीक्षण संस्थानका अध्यक्षलाई इलेक्ट्रोनिक मतदान प्रणालीबारे गलत सूचना फैलाएको अभियोगमा दोषी ठहर गरेको न्यायाधीश अलेक्जान्ड्रे डे मोरेसले बताउनुभयो ।

“यी व्यक्तिले सामाजिक अराजकता र राजनीतिक अस्थिरता सिर्जना गर्ने उद्देश्यले चुनावी प्रक्रियामाथि झुटा आख्यान फैलाए”, न्यायाधीश मोरेसले भन्नुभयो । बोल्सोनारो मुद्दाका कारण वासिङ्टनले उहाँमाथि प्रतिबन्ध लगाएको छ । सजायको अवधि सात वर्षदेखि १७ वर्षसम्म तोकिएको छ । दोषी ठहरिएका व्यक्तिले पाँच दिनभित्र अपील गर्न सक्ने छन् ।

अगस्टदेखि नजरबन्दमा रहेका बोल्सोनारोलाई अहिले सोसल मिडियामा अभिव्यक्ति दिन प्रतिबन्ध लगाइएको छ । उहाँ आफ्नो सजायको औपचारिक प्रकाशनको प्रतीक्षामा हुनुहुन्छ, जसपछि उहाँका वकिलले अपील दर्ता गर्ने तयारी गरेका छन् । सर्वोच्च अदालतले आगामी हप्तामा यसै प्रकरणमा संलग्न अन्य १६ जनामाथि पनि सजाय सुनाउने तयारी गरिरहेको जनाएको छ । रासस/एएफपी