तेह्र खाद्यान्न पसल कारवाहीमा

अर्जुन काफ्ले 

स्याङ्जा, असोज ९ गते । भीरकोट नगरपालिकाले चाडपर्व लक्षित बजार अनुगमन गरेको छ । अनुगमनका क्रममा कैफियत देखिएपछि १३ वटा खाद्यान्न पसल कारबाहीमा परेका छन् । 

दशैं–तिहारलाई लक्षित गरी खाद्यान्न पसल, मासु पसल, होटल तथा रेष्टुरेन्ट, फलफूल तथा तरकारी पसल अनुगमन गरिएको नगर उपप्रमुख भगवती रेग्मी अर्यालले जानकारी दिनुभयो । 

वडा –१ र २ को ठाडोलाइन र सिद्धार्थ राजमार्ग आसपासका बिहीबार ३४ वटा पसल अनुगमन गर्दा १३ वटा खाद्यान्न पसल कारवाहीमा परेको नगर प्रशासन प्रमुख सीताराम खनालले बताउनुभयो ।  

पाँचवटा मासु पसल, २० वटा किराना पसल, तीन वटा होटल तथा रेष्टुरेन्ट, चार वटा तरकारी तथा फलफूल पसल र दुईवटा भेटेरिनरी पसल अनुगमन गरिएको छ । 

अनुगमन गरिएका धेरै पसललाई सचेत बनाइएको र १३ पसलबाट म्याद गुज्रेका खाद्यान्न, साबुन, मसला, चाउचाउ, बिस्कुटलगायतका सामग्रीहरू जफत गरिएको खनालले बताउनुभयो । 

अनुगमनका क्रममा व्यवसाय दर्ता नगरी सञ्चालन गरिएको, पसलको परिचय खुल्ने बोर्ड नराखेको, मूल्यसूची अद्यावधिक नगरिएको, नवीकरण नभएको, इजाजतपत्र नलिई सुर्तीजन्य पदार्थ बिक्री गरेको, सरसफाइ नभएको पाइएकाले सचेत गराइएको र व्यवसायीहरूलाई व्यावसायिक अनुशासन पालना गर्न र उपभोक्ता हितमा काम गर्न सचेत बनाइएको छ । 

चाडपर्वको समयमा मात्र बजार अनुगमन गर्ने परिपाटीले गर्दा खाद्यान्न र फलफूल  पसलमा बढी समस्या देखिएको छ । नियमित बजार अनुगमन गर्ने र व्यवसायी र उपभोक्ता दुबैलाई सचेतना शिक्षा दिन सकेमा बजार व्यवस्थित हुने स्थानीय उपाभोक्ताहरूको भनाइ छ ।