वासिङ्टनमा पाकिस्तानी प्रधानमन्त्री सरिफ र ट्रम्पबिच भेट हुने; टिकटक सम्झौतामाथि कार्यकारी आदेश तयारी

वासिङ्टन, असोज ९ गते । अमेरिकी राष्ट्रपति डोनाल्ड ट्रम्पले बिहीबार ओभल अफिसमा पाकिस्तानका प्रधानमन्त्री शाहबाज सरिफसँग बन्द-ढोका सत्रसहित उच्च-स्तरीय द्विपक्षीय बैठक गर्ने तयारी भएको ह्वाइट हाउसले सार्वजनिक तालिकामा जनाएको छ ।

संयुक्त राष्ट्रसङ्घको ८० औँ महासभामा भाग लिएपछि सरिफ वासिङ्टन पुग्नुहुनेछ । उहाँले बुधबार जलवायु शिखर सम्मेलनलाई सम्बोधन गर्दै पाकिस्तानको ऋण समस्या समाधान बिना विश्वव्यापी चुनौतीको समाधान सम्भव नभएको चेतावनी दिनुभएको थियो । यसले इस्लामाबादले हरितगृह ग्यास उत्सर्जन घटाउन चालेको दाबीलाई कमजोर बनाएको टिप्पणी गरिएको छ ।

मङ्गलबार ट्रम्प र पाकिस्तानसहित आठ इस्लामिक-अरब देशका नेताबिच भेट हुँदा सरिफले अनौपचारिक रूपमा ट्रम्पसँग कुराकानी गर्नुभएको थियो । पाकिस्तानी विदेशमन्त्रीले सामाजिक सञ्जाल एक्समा पोस्ट गर्दै प्रधानमन्त्री शाहबाज र उपप्रधानमन्त्री÷विदेशमन्त्री सिनेटर इशाक दार पनि छलफलमा सहभागी भएको बताउनुभएको छ ।

तालिकाअनुसार, सरिफसँग भेटअघि राष्ट्रपति ट्रम्पले कार्यकारी आदेशमा हस्ताक्षर गर्नुहुनेछ । यसमा टिकटक सुरक्षा सम्झौताको अन्तिम निर्णय पनि समावेश हुने छ । सोमबार ह्वाइट हाउसले यसै साताभित्र सम्झौतामा ट्रम्पले हस्ताक्षर गर्ने घोषणा गरेको थियो । सम्झौता अनुसार टिकटक अमेरिकी लगानीकर्ताको बहुमत स्वामित्वमा रहने छ र राष्ट्रिय सुरक्षा तथा साइबर सुरक्षा विशेषज्ञता भएको बोर्डद्वारा सञ्चालित हुनेछ । 

ओरेकलले विश्वसनीय सुरक्षा प्रदायकका रूपमा सबै अमेरिकी प्रयोगकर्ता डाटाको स्वतन्त्र निगरानी गर्नेछ, जुन अमेरिकाभित्रैका ओरेकल सञ्चालित सर्भरमा भण्डारण गरिनेछ । ह्वाइट हाउसका प्रेस सचिव क्यारोलिन लेभिटले सम्झौताका सर्त स्पष्ट गर्दै भन्नुभयो, “राष्ट्रपतिले यस हप्ताभित्र आधिकारिक सम्झौतामा हस्ताक्षर गर्नुहुनेछ ।”

यसअघि, चिनियाँ राष्ट्रपति सी जिनपिङले पनि अमेरिकामा टिकटक सञ्चालनलाई निरन्तरता दिन सम्झौतामा सहमति जनाउनुभएको थियो । ट्रम्प र सीबिच टेलिफोन वार्तापछि बाइटडान्सले आवश्यक प्रक्रिया अघि बढाउने घोषणा गरेको थियो । कम्पनीले चिनियाँ कानूनअनुसारको काम निरन्तर गर्ने बताउँदै अमेरिकी प्रयोगकर्तालाई सेवा दिन प्रतिबद्धता जनाएको छ ।

सन् २०२४ अप्रिलमा पारित कानूनअनुसार जनवरी १९ देखि टिकटक प्रतिबन्धित हुने प्रावधान थियो, तर ट्रम्प प्रशासनले कार्यान्वयन नगरेको हो । अमेरिका र चीनबिच भइरहेको प्रस्तावित सम्झौताअनुसार अमेरिकी लगानीकर्ताले टिकटकको ८० प्रतिशत नियन्त्रण गर्ने र बाँकी २० प्रतिशत बाइटडान्ससहितका चिनियाँ कम्पनीले राख्ने योजना रहेको द वाल स्ट्रिट जर्नल र द न्युयोर्क टाइम्सले जनाएका छन् । यसैबिच, ट्रम्पले आफ्नो दिनको सुरुआत टर्कीका राष्ट्रपति रेसेप तैयप एर्दोगनसँगको कार्यक्रमबाट गर्नुहुनेछ । रासस/एएनआई