गोरखापत्र समाचारदाता
काठमाडौँ, असोज १ गते । चाडपर्वलक्षित यातायात व्यवस्थापनमा सहजता ल्याउनका लागि सार्वजनिक यातायात सेवाप्रदायकले लामो तथा मध्यम दुरीका सार्वजनिक यातायातमा अग्रिम टिकट बुकिङको व्यवस्थालाई निरन्तरता दिने भएको छ ।
यातायात व्यवस्था विभाग र यातायात व्यवसायीबिच मङ्गलबार भएको बैठकले अग्रिम टिकट बुकिङको व्यवस्थालाई निरन्तरता दिने निर्णय गरेको हो तर कहिलेदेखि अग्रिम टिकट खुला हुन्छ भन्ने कुरा खुलाइएको छ । व्यवसायीले भने दसैँ, तिहार र छठ पर्वका अवसरमा खुला गरिँदै आएको अग्रिम टिकट बुकिङ यस पटक भने औपचारिक रूपमा खुला नहुने बताएका छन् ।
बर्सातले भत्किएका राजमार्ग, सडक सुरक्षाको चुनौती, मौसमको अवस्था र यात्रुको चाप हुँदा लुटपाट हुन सक्ने भन्दै औपचारिक रूपमा अग्रिम बुकिङ घोषणा नगरिने नेपाल यातायात व्यवसायी राष्ट्रिय महासङ्घ अध्यक्ष विजयबहादुर स्वाँरले भन्नुभयो, “तीन/चार दिनअघिसम्मको टिकट काट्न मिल्ने गरी व्यवस्था गरिएकाले यात्रुले आफू अनुकूल टिकट लिएर यात्रा गर्न सकिन्छ ।”
तर विभागले भने अग्रिम टिकट बुकिङ व्यवस्थालाई निरन्तरता दिन भन्दै १९ बुँदे निर्णय सार्वजनिक गरेको छ । दसैँलगायतका चाडपर्वमा सार्वजनिक यातायातलाई सुरक्षित र सहज बनाउनका लागि भन्दै विभिन्न निर्णय गरेको हो । विभागका अनुसार दसैँको समयमा यात्रा सुरक्षित बनाउन लामो दुरीका सार्वजनिक सवारीमा कम्तीमा दुई जना चालक अनिवार्य राख्नुपर्ने निर्णय गरेको छ ।
उपत्यकाबाट बाहिरिने र उपत्यका भित्रने यात्रुलाई सहजीकरण गर्न नागढुङ्गा, कलङ्की, स्वयम्भू, हलचोक, माछापोखरी, नयाँ बसपार्क, चाबहिल, तिलगङ्गा, कोटेश्वर, जगाती, सातदोबाटो, बल्खु, दक्षिणकाली, सुन्धारा तथा काभ्रेको साँगामा सिप्रदी/नाडाको सहयोग र काठमाडौँ महानगरपालिकाको सहकार्यमा नागरिक सहायता कक्ष स्थापना गरिने भएको छ । १८ वर्ष पूरा नभएका व्यक्तिलाई चालकका रूपमा काममा लगाउन पाइने छैन ।
चाडपर्वका बेला यात्रुवाहक सवारी यातायातको चाप अत्यधिक बढ्न गई सडक दुर्घटना बढ्न सक्ने जोखिमलाई ध्यानमा राख्दै प्रभावकारी अनुगमन र निगरानीको व्यवस्था मिलाउने निर्णय गरेको छ । असोज ६ देखि २० गतेसम्म अत्यावश्यक वस्तु बोक्नेबाहेक ठुला सवारीसाधन नारायणगढदेखि काठमाडौँसम्म सञ्चालन गर्न रोक लगाउने निर्णय पनि गरिएको छ । त्यस्तै घटस्थापनादेखि पूर्णिमासम्म देशभर रुट परमिट खुलालगायतका निर्णय गरिएको छ ।
दसैँलक्षित भाडादर पारदर्शी बनाउन, अनलाइन टिकटलाई प्राथमिकता दिन, सवारीसाधनको मर्मत गरेर मात्रै चलाउन, सिटको क्षमताभन्दा बढी यात्रु नबोक्न पनि विभागले आग्रह गरेको छ ।
तर बर्सातमा सडक भत्किएको र सडक जामले गर्दा काठमाडौँ आउने बस समयमा आइनपुग्ने हुँदा यात्रुलाई सास्ती हुन सक्ने भएकाले पनि बुकिङको घोषणा नगरिएको महासङ्घले जनाएको छ । अध्यक्ष स्वाँरले भन्नुभयो, “सबै हिसाबले हेर्दा विगतमा जस्तो दसैँको चहलपहल यस पटक होला जस्तो देखिँदैन । विद्यार्थी जिल्ला फर्किसकेका छन् । घटस्थापनाबाट बिदा भएपछि बाँकी विद्यार्थी जान्छन् । अहिले पनि तीन/चार दिनअगाडि टिकट काट्न मिल्छ । सवारीको अभाव हुन दिन्नौँ ।” विगतमा घटस्थापनादेखि मात्रै उपत्यकाबाट बाहिरिने यात्रुको चाप हुने गरेकामा अहिले घटस्थापनाअघिदेखि नै यात्रु बाहिरिएका छन् । पछिल्लो तीन दिनमा करिब चार लाख यात्रु बाहिरिएको महासङ्घले जनाएको छ ।
