नवराज नेपाली
बागलुङ (गलकोट), भदौ १५ गते । उच्च अदालत बार एसोसिएसन बागलुङको अध्यक्षमा अधिवक्ता गीता श्रीष काउचा थापा सर्वसम्मत निर्वाचित हुनुभएको छ । शुक्रबारदेखि सुरु भएको बारको ३३ औं अधिवेशनबाट श्रीष अध्यक्षमा चयन हुनुभएको हो ।
यसअघि बारको सदस्यको रुपमा रहेकी श्रीष बारको अध्यक्ष बन्ने जिल्लाकै पहिलो महिला हुनुहुन्छ । अध्यक्षका लागि अधिवक्ता हरिकृष्ण सुवेदीले पनि उम्मेदवारी दर्ता गर्नुभएको थियो । अन्तिम समयमा सुवेदीले आफ्नो उम्मेदवारी फिर्ता लिएपछि श्रीष निर्विरोध निर्वाचित भएको निर्वाचन समितिले जनाएको छ ।
वरिष्ठ अधिवक्ता काजी गाउँले श्रेष्ठ, अधिवक्ता डा. डिल्लीराज गौतम र अधिवक्ता ज्ञानेन्द्रराज पन्त रहेको निर्वाचन समितिले शनिबार उम्मेदवारको अन्तिम नामावली प्रकाशन गर्दा सुवेदीले आफ्नो उम्मेदवारी फिर्ता लिनुभएको थियो ।
बारको उपाध्यक्षमा लक्ष्मी बास्कोटा, सचिवमा उमाशङ्कर सापकोटा र कोषाध्यक्षमा रामराजा कँडेल चयन हुनुभएको छ । सदस्यहरुमा नरेन्द्रप्रताप सिंह बुढाथोकी, तेजेन्द्र थापा, प्रकाश बराल र लक्ष्मीदेवी जिसी चयन हुँदा मानवअधिकार समितिको सदस्यमा गोविन्दप्रसाद ओझा चयन हुनुभएको निर्वाचत समितिका संयोजक वरिष्ठ अधिवक्ता काजीगाउँले श्रेष्ठले जानकारी दिनुभयो ।
बारको केन्द्रीय पार्सदतर्फ बद्रीप्रसाद शर्मा, हरि गौतम, गोविन्द गौतम, अखिलनाथ शर्मा चयन हुनुभएको छ । बारमा तीन सदस्य र महिला समिति संयोजक रिक्त छ । सहसचिव पदमा पुग्ने नै महिला समितिको संयोजक रहने वैधानिक व्यवस्था छ । श्रीष डिएलए गण्डकी प्रदेशको सदस्यसमेत हुनुहुन्छ ।
