गोरखापत्र समाचारदाता
काठमाडौँ, भदौ १५ गते । काठमाडौँ महानगर प्रहरी बलले विभिन्न कार्यक्रम आयोजना गरी ३३ औँ महानगर प्रहरी दिवस मनाएको छ । प्रदर्शनीमार्गस्थित राष्ट्रिय सभागृहमा शनिबार विभिन्न कार्यक्रम आयोजना गरी दिवस मनाइएको हो । विक्रम संवत् २०५० भदौ १४ गते नगर प्रहरी नायब उपरीक्षकको नेतृत्वमा २१९ जना नगर प्रहरीको दरबन्दी व्यवस्था गरेर काठमाडौँले नगर प्रहरी सेवा थालेको हो । अहिले त्यो सङ्गठन ३३ औँ वर्षमा प्रवेश गरेको हो ।
काठमाडौँ महानगरपालिकाका प्रमुख बालेन्द्र साह (बालेन) ले ‘सांस्कृतिक सहर : समृद्ध महानगर’ बनाउन महानगर प्रहरी बलको महत्त्वपूर्ण योगदान गरेको बताउनुभयो । उहाँले महानगर प्रहरीको काम सिनेमा हेरे जस्तो लाग्ने गरेको टिप्पणीसमेत गर्नुभयो ।
उहाँले भन्नुभयो, “महानगर प्रहरी बलको काम अरू स्थानीय तहका लागि पनि सिकाइको रूप बनेको छ । महानगरको सुरक्षा, ट्राफिक व्यवस्थापन, जोखिम न्यूनीकरणलगायत विविध कार्यमा नेपाल प्रहरीसँगको सहकार्य निकै राम्रो छ । आगामी दिनमा पनि कर्तव्यपालन गर्ने क्रममा अझ सशक्त, संवेदनशील र स्थानीयसँग नरम व्यवहार गर्न आवश्यक छ ।”
महानगर उपप्रमुख सुनिता डङ्गोलले जनमानससँग प्रत्यक्ष रूपमा जोडिने निकाय प्रहरी बल भएको चर्चा गर्दै भन्नुभयो, “नागरिकको सुख दुःख, मौलिक जात्रा, पर्व, संस्कार, संस्कृतिमा रमाइरहँदा त्यसको सुरक्षा व्यवस्थापनमा खटिने महानगर प्रहरी भने आफ्नै चाडपर्व मनाउनबाट वञ्चित रहनु पर्छ । त्यसैले महानगर प्रहरी बलको भूमिका अत्यन्त महत्वपूर्ण छ ।”
नेपाल प्रहरीसँगको सहकार्य, समन्वय र सहअस्तित्व अति आवश्यक रहेको उल्लेख गर्दै उहाँले सकारात्मक भावना र पहिचानलाई आगामी दिनमा पनि कायम राख्न शुभकामना व्यक्त गर्नुभयो । काठमाडौँ उपत्यका प्रहरी कार्यालयका प्रमुख प्रहरी अतिरिक्त महानिरीक्षक टेकबहादुर तामाङले नेपाल प्रहरीले महानगर प्रहरी बलसँग धेरै क्षेत्रमा सहकार्य गरेको बताउनुभयो । उहाँले भन्नुभयो, “महानगर प्रहरी स्थापना हुनुअघि नेपाल प्रहरीलाई धेरै गाह्रो थियो । सबै क्षेत्रमा खटिन सक्ने अवस्था थिएन । तर अहिले अधिकांश कार्यमा महानगर प्रहरीको सहकार्यले सहज भएको छ ।”
काठमाडौँ महानगरपालिका वडा नम्बर १५ का वडाध्यक्ष ईश्वरमान डङ्गोलले देशकै पहिलो र सङ्घीय राजधानी रहेको काठमाडौँलाई व्यवस्थित गर्नमा महानगर प्रहरीको ठुलो योगदान रहेको बताउनुभयो । सो अवसरमा गत आर्थिक वर्ष २०८१/८२ मा उत्कृष्ट कार्य सम्पादन गर्ने नगर प्रहरी वरिष्ठ नायब निरीक्षक लक्ष्मी महर्जनलाई ‘महानगर प्रहरी गौरव पुरस्कार’, नगर प्रहरी हवल्दार बालकृष्ण कार्कीलाई ‘उत्कृष्ट महानगर प्रहरी पुरस्कार’ प्रदान गरिएको थियो । त्यसै गरी ‘महानगर प्रहरी पुरस्कार’ नगर प्रहरी हवल्दार विजय तामाङ, मणिराम खनाल र नगर प्रहरी जवान फिलिपी सारूमगरलाई प्रदान गरिएको थियो भने नगर प्रहरी निरीक्षक शिवजी दाहाल र सहायक निरीक्षक सुनिता बस्नेतको ग्रेड थप गरिएको थियो । महानगरपालिकाले महानगरको चल–अचल सम्पत्ति सुरक्षा गर्ने, सभा–समारोह तथा चाडपर्वको व्यवस्थापन गर्ने, सहरी व्यवस्थापन गर्ने, सार्वजनिक सम्पत्तिको सुरक्षा र रेखदेख गर्ने, सरसफाइ र सुन्दरता जगेर्ना गर्ने, विपत् व्यवस्थापन तथा वातावरणीय सुधार गर्ने जिम्मेवारी ऐनले महानगर प्रहरीलाई प्रदान गरेको छ ।
