भवानीदत्त भट्ट
कञ्चनपुर, भदौ १४ गते । कञ्चनपुरमा सशस्त्र प्रहरी बल नेपालको विओपी (वोर्टर आउट पोष्ट) नवनिर्मित भवनको उदघाटन गरिएको छ । जिल्लाको पुनर्वास नगरपालिका–८ स्थित कंकडमा नवनिर्मित ‘विओपी’ भवनको शनिवार औपचारिक रूपमा उदघाटन गरिएको हो ।
नेपाल–भारत सीमा क्षेत्र कंकडमा पुनर्वास नगरपालिका वडा ८ का स्थानीय सिद्धराज ओझाले सशस्त्रको विओपी स्थापना गर्नका निम्ति १० कट्ठा जग्गा दान गर्नुभएको थियो । सोही जग्गामा सुदूरपश्चिम प्रदेशको आन्तरिक मामिला तथा कानुन मन्त्रालयले गत आर्थिक वर्षमा भवन निर्माण गरेको हो ।
शनिवार सुदूरपश्चिम प्रदेशका आन्तरिक मामिला तथा कानुनमन्त्री हिरा सार्कीले नवनिर्मित भवन उदधाटन गर्नुभयो । भवनको उद्घाटन गर्नुहुँदै मन्त्री सार्कीले दशगजा क्षेत्रमा विओपीको भवन निर्माणको माग भई आएबमोजिम मन्त्रालयले भवन निर्माणका लागि सहयोग गरेको बताउनुभयो । सीमा क्षेत्रको सुरक्षा व्यवस्था चुस्त पार्न मन्त्री सार्कीले आग्रह गर्नुभयो ।
आन्तरिक मामिला तथा कानुन मन्त्रालयको ४५ लाख सहयोगमा गत आर्थिक वर्षमा भवन निर्माणको काम सम्पन्न भएको कार्यक्रमका सभापति तथा मन्त्रालयका निमित्त सचिव आमोद दाहालले बताउनुभयो ।
भवनको उदघाटन कार्यक्रममा जग्गा दान गर्नुहुने स्थानीय ओझालाई मन्त्री सार्कीले सम्मानपत्र समेत प्रदान गर्नुभयो । नेपाल राष्ट्रको सिमानाको सुरक्षाका लागि स्थापित खड्डाकंकड बोर्डर आउट पोष्ट (विओपी) कार्यालय भवन निर्माणका लागि निस्वार्थ भावले जग्गा दान गरी राष्ट्रलाई गर्नुभएको अतुलनीय योगदानको उच्च मूल्याङ्कन गर्दै ओझालाई सम्मानपत्र प्रदान गरिएको मन्त्रालयका निमित्त सचिव आमोद दाहालले बताउनुभयो ।
ओझाले १० कट्टा जग्गा दान गरेपछि पाँच कट्टामा तीन कोठे विओपी भवन निर्माण गरिएको छ । सुदूरपश्चिमका सशस्त्र प्रहरी नायव महानिरीक्षक (डिआइजी) प्रदीपकुमार पालले सीमा सुरक्षाको जिम्मेवारी बाहेक राष्ट्रले सुम्पेको अन्य जिम्मेवारीमा तल्लीन भएर सशस्त्र प्रहरीले काम गरिरहेको बताउनुभयो ।
मुलुकको भूमि एक इन्च पनि तलमाथि नहुनेगरी सशस्त्र प्रहरीले संवेदनशील भई काम गरिरहेको उहाँले बताउनुभयो । यसअघि खड्डाकंकडमा सशस्त्र प्रहरीहरू अस्थायी भवनमा पाल टाँगेर बस्दै आउनुभएको थियो ।
