बिकास अधिकारी
पश्चिम नवलपरासी, भदौ १४ गते । पश्चिम नवलपरासी प्रहरीले बर्दघाटबाट तस्करीको गोरुसहित ट्रक नियन्त्रणमा लिएको छ । पूर्वपश्चिम राजमार्गअन्तर्गत बर्दघाट नगरपालिकाको टीसीएन चोकमा १८ वटा गोरु लोड गरेको ना ६ ख ९१७७ नम्बरको ट्रक प्रहरीले नियन्त्रणमा लिएको हो ।
ढुवानी गरिरहेको अवस्थामा एउटा गोरुको ज्यान गएको प्रहरीले जनाएको छ । मृत गोरुलाई पशु चिकित्सकको रोहबरमाव्यवस्थापन गरिएको छ भने बाँकी गोरु सुनवलमा रहेको कामधेनु गौशालामा पठाइएको जिल्ला प्रहरी कार्यालयका सूचना अधिकारी विरदत्त पन्तले जानकारी दिनुभयो ।
ट्रक चालक मकवानपुर हेटौँडा उपमहानगरपालिका १९ बस्तीपुरका तोयनाथ शिवाकोटीलाई प्रहरीले नियन्त्रणमा लिएर मुलुकी अपराध संहिता, २०७४ अन्तर्गत पशुपक्षी सम्बन्धी कसुरमा म्याद थप गरी अनुसन्धान भइरहेको प्रहरीले जनाएको छ ।
