काठमाडौँ, भदौ १४ गते । ताजकिस्तानमा सेप्टेम्बर ३ देखि ९ तारिखसम्म आयोजना हुने एएफसी यु–२३ एसियन कप छनोट खेल्ने नेपाली टोलीको बिदाइ गरिएको छ ।
अखिल नेपाल फुटबल सङ्घ (एन्फा) ले शनिबार खेलाडी टोलीको बिदाइ गरेको हो । खेलाडीलाई एन्फा अध्यक्ष पंकज विक्रम नेम्वाङलगायतले बिदाइ गर्नुभयो । नेपाली टोली आइतबार बिहान ताजकिस्तान प्रस्थान गर्नेछ ।
प्रमुख प्रशिक्षक नविन न्यौपानेले यसअघि नै छनोट खेल्ने २३ सदस्यीय नेपाली खेलाडी टोलीको घोषणा गरिसक्नुभएको छ । टोलीमा राष्ट्रिय सिनियर टोलीका चार खेलाडी आयुष घलान, कृतिश रत्न छुन्जु, निराजन धामी र सुमित श्रेष्ठ पनि हुनुहन्छ ।
छनोट खेलमा नेपाल समूह ‘ए’ मा रहेको छ । यस समूहमा नेपालसहित हायोजक ताजकिस्तान, सिरिया र फिलिपिन्स रहेको छ । टोलीको गोलरक्षकमा कृशाल मोक्तान, अमित टमाटा र विशाल केसी हुनुहुन्छ । रक्षकमा विवेक गुरुङ, विशाल नेपाली, लाहान सुब्बा, निग्मा लामा, राम थापा, शङ्कर थारू र सेमन्त थापा रहनुभएको छ ।
मिडफिल्डरमा अभिषेक स्याङतान, आयुष घलान, आरोन थापा, निरज कार्की, दिपेश गुरुङ, कृतिशरत्न छुन्जु, पुजन थापा, सञ्जीव लामा, सन्तोष खत्री, सुजन मगर र सुमित श्रेष्ठ हुनुहुन्छ । स्ट्राइकरमा रोहन खड्गी र निराजन धामी हुनुहुन्छ ।
