.jpg)
चन्द्र पन्दाक
ताप्लेजुङ, भदौ १४ गते । भदौ अन्तिम साता ताप्लेजुङको सिदिङ्वा गाउँपालिकामा आयोजना हुने दोस्रो तिम्बुङ पोखरी ट्रेल रन (म्याराथन) प्रतियोगिताका विजेताले ५० हजार रुपियाँ पुरस्कार पाउने भएको छ ।
पर्यटकीय गन्तव्य तिम्बुङ क्षेत्रको प्रवद्र्धन र विकास गर्ने उद्देश्यसहित आयोजना गर्न लागिएको प्रतियोगिताको विजेता उक्त पुरस्कार राशि पाउने भएको छ ।
आयोजक तिम्बुङ पोखरी संरक्षण तथा व्यवस्थापन समितिले शुक्रबार पत्रकार सम्मेलन गर्दै प्रतियोगिताका विजेताले पाउने पुरस्कार राशि लगायतबारे जानकारी गराएको हो ।
तिम्बुङ पोखरी ट्रेल रन प्रतियोगिता कार्यक्रमका संयोजक अमिर राईका अनुसार प्रतियोगिता विजेताहरू प्रथमले ५० हजार रुपियाँ, दोस्रोले ३५ हजार र तेस्रोले २० हजार रुपियाँ नगद पुरस्कारसहित प्रमाणपत्र प्राप्त गर्ने छन् ।
यस्तै महिला धावकतर्फ प्रथम हुनेले २५ हजार रुपियाँ र स्थानीयतर्फ प्रथम हुनेले १५ हजार रुपियाँ नगद पुरस्कार पाउने कार्यक्रम संयोजक राईले जानकारी दिनुभयो ।
पाँचथर र भारतको सिक्किमसँगको सिमानास्थित सिदिङ्वा गाउँपालिका–१, कालीखोलामा रहेको तिम्बुङ पोखरी क्षेत्रको प्रवद्र्धन, विकास र प्रचारप्रसार गर्न प्रतियोगिता आयोजना गर्न लागिएको हो । तिम्बुङ क्षेत्रमा पाइने दुर्लभ पदमचाल (केन्जो) को संरक्षण साथै प्रवर्धन गर्ने उद्देश्यले पनि ट्रेल रन आयोजना गरिएको समितिले जनाएको छ ।
समुद्री सतहदेखि चार हजार ३८० मिटरको उचाइमा हुन लागेको ट्रेल रन प्रतियोगिताका लागि १५ किलोमिटर कायम गरिएको छ । भदौ २६ गते हुने प्रतियोगिताका लागि सिदिङ्वा गाउँपालिका, पर्यटन कार्यालय काँकड्भिट्टा झापाको आर्थिक सहयोग रहने तिम्बुङ पोखरी संरक्षण तथा व्यवस्थापन समितिका अध्यक्ष यामबहादुर बानियाँले जानकारी दिनुभयो ।
