बाबुराम देवकोटा
सिन्धुलीमाढी, भदौ १४ गते। सिन्धुली जिल्लामा नवलपुर–चिसापानी रणनीतिक सडक निर्माणले गति लिन सकिरहेको छैन।
नेपाल सरकारको ‘एक निर्वाचन क्षेत्र, एक रणनीतिक सडक’ योजना अन्तर्गत ६८ किलोमिटर लम्बाइको नवलपुर–चिसापानी (नवलपुर–बाहुनतिल्पुङ–चकमके–डकाहा–चिसापानी) सडक पाँच वर्षअघि निर्माण सुरु गरिएको थियो। तर निर्माणमा भएको ढिलासुस्ती र पर्याप्त बजेट अभावमा उक्त रणनीतिक सडक निर्माणको प्रगति सुस्त देखिएको छ। उक्त सडक सङ्घीय निर्वाचन क्षेत्र नम्बर १ को रणनीतिक सडक भएको स्थानीयले बताएका छन्।
स्थानीयका अनुसार निर्माणमा भएको ढिलासुस्ती र बजेट अभावमा उक्त सडकको कार्य प्रगति सुस्त देखिएको हो। २०७८ सालदेखि नै उक्त सडकमा विभिन्न खण्डमा ठेक्का लगाई काम अघि बढाइएको छ। बिचमा पर्ने १० किलो मिटर लम्बाइको लुम्ती–बाहुनतिल्पुङ खण्डको काम अत्यन्तै ढिलाई भएको र जेठ अन्तिमदेखि नै निर्माणको काम रोकिएको अवस्था छ।
सङ्घीय सरकारको करिब आठ करोड रुपियाँमा लुम्ती–बाहुनतिल्पुङ खण्डको कामका लागि गौरीगणेश–अभियान–श्वेता जेभीले २०७८ साल फागुनमा नै ठेक्का सम्झौता गरी निर्माणको काम अघि बढाएको भए पनि हालसम्म ५५ प्रतिशत मात्रै भौतिक प्रगति देखिएको डिभिजन सडक कार्यालय खाल्टे सिन्धुलीले जनाएको छ।
कार्यालयका इन्जिनियर (उक्त साइड हेर्ने) दिपेश मुनकर्मीले उक्तखण्डको काम सुरुमा श्वेताले गरेको र श्वेताले नसकेर बिचमा नै छाडेपछि जेभीमा रहेका बाँकी अरू दुई वटा निर्माण कम्पनीले अहिले काम अघि बढाएको जानकारी दिनुभयो।
मध्यपहाडी लोकमार्ग अन्तर्गत फिक्कल गाउँपालिका–२, नवलपुरबाट निर्माण सुरु भएको उक्त सडकले धनुषा जिल्लाको चिसापानीलाई जोड्छ।
उहाँका अनुसार उक्त सडक निर्माणका क्रममा सङ्घ र प्रदेशको गरी हालसम्म एक अर्ब रुपियाँको हाराहारीमा खर्च भइसकेको छ। तर निर्माण कार्यले तीब्रता लिन सकेको छैन। सडकको कुल लम्बाई ६८ किलो मिटर मध्ये १५ किलो मिटर मात्रै कालोपत्रे सहित सम्पन्न भएको छ।
