ब्रासिलिया, भदौ १३ गते । अमेरिकाले ब्राजिलबाट आउने वस्तुमा ५० प्रतिशत भन्सार शुल्क लगाएपछि, ब्राजिल सरकारले त्यसको प्रतिक्रियास्वरूप के–के कदम चाल्न सकिन्छ भन्ने विषयमा गम्भीररूपमा विचार गरिरहेको छ ।
ब्राजिलका राष्ट्रपति लुइज इनासियो लुला दा सिल्भाले पूर्व राष्ट्रपति जाइर बोल्सोनारो सम्बन्धी मुद्दालाई लिएर अमेरिकाले लगाएको शुल्कप्रति उचित जवाफ दिन सकिने विकल्पको समीक्षा गर्न निर्देशन दिनुभएको छ । ब्राजिलको उद्योग तथा व्यापार मन्त्रालयले आगामी ३० दिनभित्र अमेरिकी शुल्क हालै पारित आर्थिक पारस्परिकता सम्बन्धी ऐनअनुसार पर्छन् वा पर्दैनन् भनी समीक्षा गर्नेछ ।
यी शुल्क उक्त ऐन अन्तर्गत पर्ने जस्ता देखिए भने विज्ञबाट बनाइने सुझावअनुसार समानान्तर कदम चालिने सम्भावना रहनेछ । ब्राजिल सरकारले यसबारे अमेरिकालाई औपचारिक रूपमा जानकारी गराउने तयारी गरेको छ । यद्यपि कूटनीतिक संवादका लागि अवसर खुला रहेको स्पष्ट पारिएको छ ।
आर्थिक प्रतिस्पर्धामा नकारात्मक असर पार्ने कुनै पनि एकपक्षीय कदमको विरुद्धमा यो ऐनले सरकारलाई आवश्यक प्रतिकारात्मक उपाय अपनाउन सक्षम बनाएको छ । ती उपायमा व्यापार सहुलियत, लगानी सम्झौता र बौद्धिक सम्पत्ति सम्बन्धी सम्झौता स्थगित वा रद्द गर्ने विकल्प पनि समावेश छ । अगस्त ६ गतेदेखि लागू भएको अमेरिकाको भन्सार शुल्कले दुई देशबिचको सम्बन्धमा केही तनाव सिर्जना गरेको छ ।
यस विषयमा राष्ट्रपति लुलाले आफ्नो चिन्ता व्यक्त गर्दै अमेरिका पक्षसँग प्रभावकारी संवादको अवसर नभएको बताउनुभएको छ । ट्रम्प प्रशासनले यो कदम पूर्व राष्ट्रपति बोल्सोनारो सम्बन्धी मुद्दा समाधानको प्रयत्नको रूपमा लिएको जनाएको छ । ब्राजिलले यस विवाद समाधानका लागि अन्तर्राष्ट्रिय व्यापार सङ्गठनको सहयोग पनि खोजिरहेको छ । रासस/एएफपी
