राजु लामिछाने
रुकुमपश्चिम, भदौ १३ गते । रुकुमपश्चिमको मुसीकोट नगरपालिका-१ स्थित नेपाल पत्रकार महासङ्घ जिल्ला शाखाको सम्पर्क कार्यालयमा लगाइएको ताला खुलेको छ । विगत ५ महिनाअघि लगाइएको ताला खुलेको पत्रकार महासङ्घ रुकुमपश्चिमका सचिव दीपेन्द्र महताराले जानकारी दिनुभयो ।
उहाँका अनुसार नेपाल प्रेस युनियन, नेपाल प्रेस चौतारी र समाजवादी प्रेस सङ्गठनले विभिन्न माग राख्दै लगाएको ताला सहमतिपछि खोलिएको हो ।
साधारण सदस्यको शुद्धीकरण तथा सिफारिस, जिल्ला शाखाभित्रको आर्थिक पारदर्शिता, समानुपातिक विज्ञापन प्रणाली र जिल्ला कार्यसमितिमा मनोनीत सदस्यका विषयमा वर्तमान शाखाले मनोमानी गरेको भन्दै गत चैत ५ गते सम्पर्क कार्यालयमा तीन सङ्गठनले तालाबन्दी गरेका थिए ।
आन्दोलनरत विभिन्न सङगठन र पत्रकार महासङ्घबीच पटकपटक भएको छलफल र वार्ताको निष्कर्ष अनुसार सङ्गठनहरुले राखेका मागका सम्बन्धमा पत्रकार महासङ्घ सकारात्मक रहेको र आगामी दिनमा सुधार गर्दै लैजाने प्रतिबद्धतामा दुबै पक्षको सहमतिपछि तालाबन्दी खुलेको सचिव महताराले जानकारी दिनुभयो । उहाँले जिल्लामा सञ्चार माध्यमको विकास र विस्तार तथा पत्रकार आचारसंहिताको परिपालनाले मात्रै रुकुमेली सञ्चार क्षेत्रको हित हुने विषयमा एकमत रहेको समेत जनाउनुभयो ।
मुसीकोट नगरपालिका १ मा पत्रकार महासङ्घको भवन निर्माण भएको बर्षौ बितिसक्दा पनि प्रयोगमा आउन सकेको छैन । उक्त भवन अलपत्र सरह रहेको छ । भवन निर्माणको क्रममा अनियमितता भएको भन्दै अख्तियार दुरुपयोग अनुसन्धान आयोगमा उजुरी परेको थियो । उजुरी टुङ्गोमा नपुगेको र भवन हस्तान्तरण नभएकोले महासंघले कोठा भाडामा लिएर कार्यालय सञ्चालन गर्दै आएको छ ।
