ललितपुर, भदौ १३ गते । ललितपुर महानगरले उद्यमी महिलाको उत्पादनलाई बजारसम्म पुर्याउन एलएमसी हाटबजार एप सार्वजनिक गरेको छ ।महानगरमा दर्ता भएका उद्यमीले उत्पादन गरेका उत्पादनलाई बजारसम्म पुर्याउन यो एप निर्माण गरी सार्वजनिक गरिएको हो ।
महिला उद्यमीले आफ्नो उत्पादनको सम्पूर्ण विवरण उक्त एपमा राख्नुपर्छ । क्रेताले एप्समा राखेको सामान खरिद गर्न लगइन गरी अर्डर गर्न सक्छन् । उत्पादित सामग्री एप्पमा राख्नका उद्यमीले महानगरका सम्पर्क गरी लगइन गर्नुपर्छ ।
ललितपुर महानगरका प्रमुख चिरीबाबु महर्जनले महिलाको उत्पादनलाई बजारीकरणका लागि ल्याइएको एप एक महत्वपूर्ण ‘टुल’ भएको बताउनुभयो । उहाँले भन्नुभयो, ‘‘आइटीको जमानामा महानगरले सार्वजनिक गरेको यो एप महत्वपूर्ण हो । महिला उद्यमीको उत्पादन बजारमा ल्याउन यो एपले धेरै मद्दत गर्नेछ । सम्पूर्ण महिला उद्यमीलाई यो एप सक्दो प्रयोग गर्न अनुरोध गर्नुहोस् ।’’
यो एपले ‘उत्पादन छ तर बजार छैन’ भन्ने कुरालाई समाधान गर्न केही हदसम्म सहयोग गर्ने महानगरको विश्वास छ । उपप्रमुख तथा महिला उद्यमशीलता सहजीकरण केन्द्रका संयोजक मञ्जली शाक्य बज्राचार्यले उद्यमीले उत्पादन गरेको उत्पादनले बजार नपाइराखेको अवस्थामा बजारसम्म उत्पादनलाई पुर्याउन यो एप महत्वपूर्ण हुने बताउनुभयो ।
उहाँले भन्नुभयो, ‘‘उद्यम र व्यवसाय एकै होइन, उद्यमीले व्यवसाय सञ्चालन गर्न गाह्रो हुन्छ, यो एपले उद्यमीलाई क्रेतासँग जोड्न सजिलो बनाउँछ, जसले बजार खोज्ने सहयोग पुग्छ ।’’
वर्षैपिच्छे वडा र महानगरले धेरैवटा हाट बजार सञ्चालन गरे पनि सधैँ सञ्चालन भइरहने बजारका लागि यो एप ल्याएको उपप्रमुखको भनाइ छ । महिला शाखा प्रमुख शोभादेवी खरेलले महिला उद्यमीलाई आफ्नो उत्पादनको बिक्री वितरण गर्न यो एप महत्वपूर्ण हुने धारणा राख्नुभयो ।
एपमार्फत खरिद बिक्री गर्दा मध्यस्तकर्ताको आवश्यकता पर्दैन । क्रेताले विक्रेतासँगको सिधैं मोलमोलाई गर्न सक्छन् । सामानको गुणस्तरको बारेमा सोधपुछ गर्न सक्छन् ।
काठमाडौं विश्वविद्यालय स्कूल अफ म्यानेजमेन्ट (कुसुम) कुसुम कलेज डा. विनोदकृष्ण श्रेष्ठले महानगरले उद्यम र उद्यमशीलतालाई महत्व दिएर एप सार्वजनिक गरेकोमा धन्यवाद दिनुभयाे। उद्यमी र क्रेताबीच सिधै सम्पर्क हुने यो एपले उत्पादनको बजारीकरणलाई सहयोग पुग्ने यसैगरी, एप सार्वजनिक कार्यक्रमपछि उद्यमशीलतासम्बन्धी जानकारी दिन अभिमुखीकरण कार्यक्रम आयोजना गरिएको छ ।
