विनय कर्ण
कल्याणपुर (सप्तरी), भदौ १३ गते । वैदेशिक रोजगारीका क्रममा मलेसियामा निधन भएका सप्तरीको रुपनी गाउँपालिका २ हरिरावाटोल निवासी दीपककुमार रामको परिवारलाई गाउँपालिकाले राहत उपलब्ध गराएको छ ।
शुक्रबार रुपनी गाउँपालिका अध्यक्ष दिनेशकुमार यादव मृतकको घर पुगेर परिवारलाई राहतस्वरुप खाद्यान्न सामग्री हस्तान्तरण गर्नुभएको हो ।
अध्यक्ष यादवले तत्काल खाद्य सहायता उपलब्ध गराइएको र आगामी दिनमा पनि गाउँपालिकाले सक्दो सहयोग गर्ने प्रतिबद्धता व्यक्त गर्नुभयो । मृतक राम करिब एक दशकदेखि मलेसियाको एक प्लास्टिक फ्याक्ट्रीमा कार्यरत रहनुभएको थियो । गत शुक्रबार अचानक बिरामी भई अस्पताल भर्ना गरिएका रामको सोमवार निधन भएको समाचार परिवारले प्राप्त गरेको हो ।
परिवारका एकमात्र कमाउने दीपकको मृत्यु भएपछि श्रीमती रेणुकुमारी राम र ७ वर्षीय छोरा विप्लव तथा २ वर्षीया छोरी रिषिका बिचल्लीमा परेका छन् । अध्यक्ष यादवले बालबालिकाको पढाइ लेखाइमा समेत गाउँपालिकाले सहयोग गर्ने आश्वासन दिनुभयो ।
गत शुक्रबार दीपकसँग दिनको ११ बजे अन्तिम पटक कुराकानी भएको उहाँकी श्रीमती रेणुकुमारी रामले बताउनुभयो । “गत शुक्रबार दिनको करिब ११ बजे दीपकसँग फोनमा कुरा भएको थियो, स्वास्थ्य सामान्य नै लागिरहेको थियो । तर, सोमबार अचानक मृत्यु भएको खबर आयो," उहाँले भन्नुभयो ।
मृत्युको कारणबारे स्पष्ट कुनै जानकारी नआएकोले घटनाको यथार्थ कारण र शव छिटो नेपाल ल्याइदिन सरकारसँग उहाँले आग्रह गर्नुभयो ।
