तिलाचन पाण्डे
तम्घास(गुल्मी),भदौ १३ गते । गुल्मीको बडीगाड पारका इलाका प्रशासन नहुँदा स्थानीय नागरिकलाई सेवा लिन सदरमुकाम तम्घास जानुपर्ने समस्याकोे सताउने गरेको छ । केही दिन पहिले सङ्घीय सरकारले देशका थप २३ स्थानमा नयाँ इलाका प्रशासन कार्यालय स्थापना गर्ने निर्णयमा गुल्मी नपरेपछि थप समस्या भएको हो ।
सदरमुकामबाट भौगोलिक रुपले कालीगण्डकी, सत्यवती र चन्द्रकोट गाउँपालिकालाई प्रशासनको सेवा लिनका लागि तम्घास जान समय र पैसा दुबै बढी खर्च हुने गर्दछ । कालीगण्डकी गाउँपालिका वडा नम्बर ६ को लुङबाट तम्घास जान करिब ८० किलोमिटर यात्रा गर्नुपर्दछ । त्यहाँबाट नियमित रुपमा गाडी नचल्ने भएकाले नागरिकता, पासपोर्ट बनाउनका लागि गाडी नै रिजर्भ गरेर जानुपर्ने बाध्यता हुन्छ ।
केही महिना पहिले कालीगण्डकी गाउँपालिकाबाट सेवा लिन तम्घास पुग्दा प्रशासनले राहदानीका लागि टोकन सकिएको बताएपछि रिसको झोंकमा पालिका अध्यक्ष वेदबहादुर थापाले स्क्यानर नै फुटाइदिनुभएको थियो ।
कालीगण्डकीबाट तम्घास सेवा लिन पुग्दा दिनको करिब ३ बज्ने र सहज रुपमा सेवा लिन नपाउँदा त्यस दिन बास बसेर अर्को दिन सेवा लिनुपर्ने बाध्यता छ । कालीगण्डकी ५ का ऋषि रानाले यस समस्यालाई समाधान गर्नका लागि इलाका प्रशासन नै आवश्यक रहेकोे बताउनुभयो ।
पालिका अध्यक्षहरुको आफू अनुकूलका तर्क
नागरिकलाई इलाका प्रशासनको चिन्ता रहे पनि राजनीति गर्ने स्थानीय नेताहरुले भने आफूहरुको अनुकूलमा इलाका प्रशासन हुनुपर्ने तर्क राख्दै आएका छन् ।
सत्यवती गाउँपालिकाका अध्यक्ष टीकाराम पाण्डेले गाउँपालिकाको वडा नम्बर ६ जोहाङमा भौतिक संरचना पनि तयारी अवस्थामै रहेकाले इलाका प्रशासन जोहाङ नै उपयुक्त हुने दाबी गर्नुभयो । इलाका प्रशासनका लागि जोहाङ प्राथमिक स्वास्थ्य केन्द्रको भौतिक संरचना उपलब्ध गराउने बताउँदै चन्द्रकोटको मजुवामा नापी र मालपोत कार्यालय भएकाले विकेन्द्रीकरणको नीति अनुसार पनि जोहाङ नै उपयुक्त हुने उहाँको भनाइ छ ।
चन्द्रकोट गाउँपालिकाका अध्यक्ष युवराज क्षेत्रीले २०६५ सालमै सामान्य प्रशासन मन्त्रालयले जिल्लाको सहमतिमै चन्द्रकोट गाउँपालिकाको मजुवामा इलाका प्रशासन राख्ने निर्णय गरेकाले त्यसैलाई नै कार्यान्वयन गर्नुपर्नेमा जोड दिनुभयो । निर्णय भएको विषयवस्तुलाई कार्यान्वयन नगरी अनावस्यक हल्ला गर्नु र विरोधको कुनै तर्क नरहेको उहाँको भनाइ छ ।
कालीगण्डकी गाउँपालिकाका अध्यक्ष वेदबहादुर थापाले नागरिकलाई सहज र सरल रुपमा पहुँच पुग्ने स्थानमै इलाका प्रशासन हुनुपर्नेमा जोड दिनुभयो । त्यसका लागि सबै हिसावले रुरुक्षेत्र गाउँपालिकाको रिडी नै उपयुक्त हुने उहाँको दाबी छ ।
रुरुक्षेत्र गाउँपालिकाका अध्यक्ष यदु ज्ञवालीले रुरुक्षेत्रको रिडीमा इलाका प्रशासन राख्दा सबैलाई पायक पर्ने बताउनुभयो । सडक सञ्जालले जोडिएको क्षेत्र पनि भएको भौतिक संरचना पनि तयारी अवस्थामा रहेको बताउँदै यहाँका लागि कालीगण्डकी गाउँपालिकाले सहमति दिइसकेको र अन्य पालिकासँग पनि समन्वय भइरहेको उहाँको भनाइ छ ।
गुल्मी क्षेत्र नम्बर १ का पूर्व प्रतिनिधिसभा सदस्य तथा मन्त्री प्रदीप ज्ञवालीले जिल्लाबाट सिफारिस हुन ढीला भएका कारण अहिले हुन नसकेको बताउनुभयो । त्यसका लागि आफूले पहल गरेको उहाँको भनाइ छ ।
गुल्मी क्षेत्र नम्बर १ का प्रतिनिधिसभा सदस्य चन्द्रकान्त भण्डारीले जिल्लामा सर्वपक्षीय सहमति अनुसार जिल्ला सुरक्षा समितिबाट सिफारिस गरेर पठाउनका लागि आफूले पहल गरेको बताउनुभयो । यसमा आफूले कुनै राजनीति गर्नुभन्दा पनि सबैलाई पायक पर्ने स्थानमा नै राख्नु उपयुक्त हुने उहाँको भनाइ छ ।
