लीलाधर वली
घोराही, भदौ १३ गते । देउखुरीको गढवा गाउँपालिका–५ गढवामा निर्माणाधीन १५ शय्याको अस्पतालको ७० प्रतिशत निर्माणको काम सकिएको छ । चालु आर्थिक वर्षभित्र भवन निर्माणको काम सकेर अस्पतालाई सञ्चालन ल्याउने गरी निर्माणको काम धमाधम भइरहेको छ ।
भ्याटसहित १३ करोड ४९ लाखको रुपियाँमा ठेक्का सम्झौता भएर अस्पतालको भवन निर्माणको काम भइरहेको गढवा गाउँपालिका इन्जिनियर शेषमणि पौडेलले जानकारी दिनुभएको छ । उहाँका अनुसार साढे दुई तलाको भवनको ढलान कार्य सकेर अहिले वाल निर्माणको काम भइरहेको छ । अस्पालको भवन निर्माणअन्तर्गत तल्लो तलाको काम सकेर दोस्राे तलाको काम भइरहेको इन्जिनियर पौडेलले भन्नुभयो, ‘‘वाल निर्माणको काम सकिएपछि प्लाष्टर, रङरोगन, वाइरिङको काम हुन्छ ।’’ उहाँका अनुसार भवनको काममा अब केही पूर्वाधार र अन्तिम सजावटको काम बाँकी छ ।
नेपाल सरकारको हरेक स्थानीय तहमा १५ शय्याको अस्पताल निर्माण गर्ने उद्देश्य अनुसार २०७९ सालमा श्याम सुन्दर-एन.वि. जेभी बुटवलसँग ठेक्का सम्झौता भएर अस्पताल निर्माणको काम सुरु भएको थियो । सम्झौता अनुसार २०८१ मसान्तभित्र अस्पताल निर्माणको काम सक्नुपर्ने भए पनि नसकिएपछि एक वर्षका लागि म्याद थप गरिएको बताउनुभयो । अस्पताल निर्माणको काम गतबर्ष सकिनुपर्ने भएपनि समयमा भुक्तानी नहुने समस्या कारण समस्या भएको बताउनुभयो । हालसम्म अस्पताल निर्माणमा करिव ६० प्रतिशत वित्तीय खर्च भएको छ ।
अस्पताल निर्माण भएर सञ्चालन भएपछि देउखुरीको राप्ती नदी दक्षिण क्षेत्रका स्थानीयलाई स्वास्थ्य सेवा ल्याउन सहजता हुने गढवा गाउँपालिका–५ गढवा सुनीता यादव बताउनुहुन्छ । दक्षिण देउखुरी क्षेत्रमा अस्पताल नहुँदा अहिले बिरामीलाई लमहीसँगै घोराही जानुपर्ने बाध्यता रहेको भन्दै अस्पताल निर्माण भएपछि टाढा जानुपर्ने बाध्यताको अन्त्य हुने बताउनुहुन्छ । अस्पाल नहुँदा गढवा गाउँपालिकाले स्वास्थ्य केन्द्रमा दुई जना एमबिबिए डाक्टरसहितको जनशक्ति व्यवस्थापन गरेर बिरामीलाई सेवा दिँदै आएको छ ।
