घाइते ३९ कैदीबन्दी अस्पतालबाट डिस्चार्ज

अविनाश चौधरी

धनगढी, भदौ ३ गते। कैलाली कारागारमा हिंसात्मक झडपमा परी घाइते भएका ३९ कैदीबन्दी अस्पतालमा डिस्चार्ज भएका छन्।

निको भएपछि सेती प्रादेशिक अस्पतालले उनीहरुलाई डिस्चार्ज गरेको हो।अस्पतालले डिस्चार्ज गरेका मध्ये ३४ जनालाई कोभिड अस्पतालमा राखिएको प्रमुख जिल्ला अधिकारी कृष्णप्रसाद लम्सालले जानकारी दिनुभयो।उहाँका अनुसार निको भएका पाँच जना कैदीलाई उनीहरुको इच्छानुसार अन्यत्र स्थानान्तरण गरिएको छ।

चार जनालाई कञ्चनपुर कारागार र एक जनालाई नवलपरासी कारागारमा स्थानान्तरण गरेको जनाइएको छ।बाँकीलाई पनि अन्यत्र स्थानान्तरणको लागि कारागार प्रशासन र जिल्ला सुरक्षा समितिले पहल गरिरहेको छ।यहाँ रहेकामध्ये केहीले अन्यत्र स्थानान्तरण भएर जाने इच्छा व्यक्त गरेको प्रमुख जिल्ला अधिकारी लम्सालको भनाइ छ।केही कैदीबन्दी भने कोभिड अस्पतालमै बस्न चाहेको उहाँले उल्लेख गर्नुभयो।

साउन २३ गते मध्यरातमा कैलाली कारगारमा ब्लक ए र ब्लक बी का कैदीबिच हिंसात्मक झडप भएको थियो।ब्लक ए का कैदीले ब्लक बी का कैदीमाथि आक्रमण गर्दा धनगढीका भरत चौधरीको ज्यान गएको थियो भने ४७ जना घाइते भएका थिए।मृतक चौधरी लागुऔषध मुद्दामा कैद सजाय भुक्तान गर्दै हुनुहुन्थ्यो।

घाइते सबैलाई सेती प्रादेशिक अस्पतालमा उपचारका लागि भर्ना गरिएको थियो।गम्भीर अवस्थाका तीन जना घाइते कैदीबन्दीलाई थप उपचारका लागि काठमाडौं लगिएको थियो।उनीहरुको अवस्था अब खतरामुक्त रहेको प्रजिअ लम्सालले जानकारी दिनुभयो।त्यस्तै, धनगढीको कोभिड अस्पतालमा तीन र सेती प्रादेशिक अस्पतालमा दुई जना घाइतेको उपचार भइरहेको छ।अब आठ जना घाइते निको हुन बाँकी रहेको जनाइएको छ।

कारागार घटना छानविनका लागि सहायक प्रमुख जिल्ला अधिकारी किरण जोशीको संयोकत्वमा छानबिन समिति गठन गरिएको थियो।यसैगरी, पीडित परिवारको जाहेरीका आधारमा प्रहरीले घटनाको अनुसन्धान गरिरहेको छ।छानबिन र अनुसन्धान जारी रहेको प्रजिअ लम्सालले आज पत्रकार भेटघाटमा जानकारी दिनुभयो।