झेङ्झोउ (चीन), साउन ९ गते । सिन्ह्वा समाचार एजेन्सीका अध्यक्ष फु हुआले बिहीबार मध्य चीनको हेनान प्रान्तको राजधानी झेङ्झोउमा आयोजित साङ्घाई सहयोग सङ्गठन (एससिओ) मिडिया र थिङ्क ट्याङ्क शिखर सम्मेलनमा सहभागी मिडिया नेताहरूसँग छुट्टाछुट्टै भेटघाट गर्नुभयो ।
एससिओ ढाँचाभित्र दिगो विकासका लागि एकता र सहयोगलाई सुदृढ पार्ने तरिकाहरू खोज्न र व्यापक सहमति बढाउन एकजुट भएका एससिओ देशहरूका मिडिया सङ्गठन र थिङ्क ट्याङ्कका प्रतिनिधिहरूलाई फुले स्वागत गर्नुभयो । उहाँले साझा विकास, साझा समृद्धि र शान्ति प्रवर्धनका लागि संयुक्त प्रयास, एससिओको साझा भविष्य निर्माण गर्न विवेक र शक्तिको योगदानका लागि मैत्रीपूर्ण सहयोगका राम्रो कथाहरू सुनाउन सबै पक्षहरू मिलेर काम गर्ने अपेक्षा गरेको बताउनुभयो ।
तियान्जिनमा एससिओ शिखर सम्मेलनका क्रममा आयोजित मिडिया र थिङ्क ट्याङ्क शिखर सम्मेलनले सहयोगलाई गहिरो बनाउन र साझा विकास खोज्नका लागि पुलको रूपमा काम गर्ने कुरामा सबै पक्ष सहमति जनाएका थिए । इस्लामिक सहयोग सङ्गठनको समाचार एजेन्सी सङ्घका महानिर्देशक मोहम्मद अल्यामीले अरबीभाषी दर्शकहरूसँग चीनका कथाहरू साझा गर्न तयार रहेको र समाचार आदानप्रदानमा सिन्ह्वासँगको सहयोगबाट थप फलदायी परिणामहरूको आशा व्यक्त गर्नुभयो ।
बेलारुसी टेलिग्राफ एजेन्सीकी महानिर्देशक इरिना अकुलोभिचले चीनलाई अन्तर्राष्ट्रिय व्यवस्थाको मुख्य रक्षकका रूपमा प्रशंसा गर्नुभयो र सिन्ह्वासँग आदानप्रदान गहिरो बनाउने र दुई एजेन्सीहरू बीचको व्यावहारिक सहयोगमा नयाँ अध्याय खोल्ने प्रतिज्ञा गर्नुभयो । किर्गिजस्तानको काबार समाचार एजेन्सीका निर्देशक मेदेरबेक शेर्मेतालिएभले दुई समाचार एजेन्सीले कर्मचारी आदानप्रदान र पारस्परिक सिकाइलाई थप बलियो बनाउने तथा एससिओ ढाँचाअन्तर्गत दुई देश बीचको नजिकको सहयोगमा योगदान पुर्याउने आशा व्यक्त गर्नुभयो ।
रुसको तास समाचार एजेन्सीका महानिर्देशक आन्द्रे कोन्द्राशोभले सिन्ह्वासँगको रणनीतिक साझेदारीलाई गहिरो र व्यापक बनाउन र नयाँ युगका लागि चीन-रुस व्यापक रणनीतिक समन्वयको साझेदारीको विकासमा योगदान दिन आफ्नो एजेन्सी तयार रहेको बताउनुभयो । एससिओ मिडिया र थिङ्क ट्याङ्क शिखर सम्मेलन झेङ्झोउमा जुलाई २३ देखि २७ सम्म आयोजना हुँदैछ । यो चीनको राज्य परिषद् सूचना कार्यालयको मार्गदर्शनमा सिन्ह्वा, चिनियाँ सामाजिक विज्ञान एकेडेमी र हेनान प्रान्तीय सरकारद्वारा संयुक्त रूपमा आयोजना गरिएको छ । रासस/सिन्ह्वा
