भरुवा बन्दुकसहित दुई जना पक्राउ

अविनाश चौधरी

धनगढी, साउन ९ गते । कैलाली प्रहरीले भरुवा बन्दुकसहित दुई जनालाई पक्राउ गरेको छ । प्रहरीले गोदावरी नगरपालिका –८ स्याउलेका २६ वर्षीय राजु चौधरी र २३ वर्षीय चन्द्रबहादुर चौधरीलाई पक्राउ गरेको हो । 

विशेष सूचनाको आधारमा इलाका प्रहरी कार्यालय मालाखेती र प्रहरी बिट स्याउलेबाट खटेको प्रहरी टोलीले उनीहरुलाई पक्राउ गरेको जिल्ला प्रहरी कार्यालयको मुद्दा शाखाका गणेश नाथले जानकारी दिनुभयो । 

प्रहरीले राजुको घरमा खानतलासी गर्दा एक नाल भरुवा बन्दुक, चित्तलको सिंह र खुट्टाको आधा भाग फेला पारेको थियो । यसैगरी, चन्द्रबहादुरको घरमा पनि खानतलासी गर्दा एक नाल भरुवा बन्दुक फेला पारेको जनाइएको छ । 

दुई नाल बन्दुकसहित पक्राउ परेका दुवै जनालाई इलाका प्रहरी कार्यालय मालाखेतीको हिरासतमा राखेर आवश्यक अनुसन्धानको कार्य भइरहेको जिल्ला प्रहरी कार्यालयले जानकारी दिएको छ ।