सर्वोच्चमा एकचालिस प्रतिशत मुद्दा फर्स्योट

गोरखापत्र समाचारदाता

काठमाडौँ, साउन २ गते  । सर्वोच्च अदालतले ४१ प्रतिशत मुद्दा फर्स्योट  गरेको छ । २०८२ असार मसान्तसम्म सर्वोच्चमा अब २४ हजार मुद्दा बाँकी भएका छन् । जसमा दुई वर्ष नाघेका मुद्दा आठ हजार ९४८ थान छन् । 

सर्वोच्चमा चालु वर्षका लागि जिम्मेवारी सरेका २५ हजार ७२८ मुद्दा थिए । यस्तै १५ हजार ३४ नयाँ दर्तासमेत कुल ४० हजार ७६२ थान मुद्दा कायम भएका थिए । जसमध्ये अदालतले १६ हजार ६३५ थान मुद्दा फर्स्योट  गरेको हो । २०८१ असार मसान्तसम्म सर्वोच्चमा जम्मा मुद्दा ४१ हजार थियो । चालु वर्षमा मुद्दाको कुल सङ्ख्या सामान्य घटेको हो । पाँच वर्ष नाघेका मुद्दा अब सर्वोच्च अदालतमा एक हजार २६४ थान बाँकी छन् । यस्तै देशभरका उच्च अदालतले ६९ प्रतिशत मुद्दा फर्स्योट गरेका छन् । जिल्ला अदालतले समग्रमा ६२ प्रतिशत मुद्दा फस्र्योट गरेका छन् । तिनै तहका अदालतको कुल मुद्दा फस्र्योट ६१ प्रतिशत रहेको छ । 

विशेषमा ६१ प्रतिशत फर्स्योट 

विशेष अदालतले चालु वर्षमा ६१ प्रतिशत मुद्दा फर्स्योट  गरेको छ । जिम्मेवारी सरेकासमेत २१२ थान लगतमध्ये विशेषले १३० मुद्दा फर्स्योट  गरेको हो । विशेषले गैरकानुनी सम्पत्ति आर्जन, घुस तथा रिसवत, निर्णयगत अनियमितता, नक्कली शैक्षिक प्रमाणपत्रलगायतका मुद्दा हेर्ने अधिकार क्षेत्र पाएको छ । 

जिम्मेवारी सरेका ६९ र नयाँ दर्ता १४३ गरी जम्मा लगत २१२ थान कायम भएकोमा १३० थान मुद्दा फस्र्योट गरेको छ । कुल लगतको यो ६१.३२ प्रतिशत हो । अब ८२ थान मुद्दा विशेषमा विचाराधीन छन् । गत वर्षभन्दा मुद्दा फस्र्योट कम हो । अघिल्लो वर्ष विशेषले ८८ प्रतिशत मुद्दा फस्र्योट गरेको थियो । 

विशेषले गैरकानुनी सम्पत्ति आर्जनका १२ मध्ये दुई मात्र मुद्दा फर्स्योट  गरेको छ । घुस रिसवतका ४३ मध्ये ३४, निर्णयगत अनियमितताका ११० मध्ये ५६, नक्कली प्रमाणपत्रका ४१ मध्ये ३३ मुद्दा फस्र्योट गरेको छ । सम्पत्ति शुद्धीकरणका चार मुद्दामा तीन वटामा फैसला र एक मुलतबीमा राखेको छ । अदालतको अवहेलनाको एक मुद्दा विचाराधीन छ । अदालतले मासिक रूपमा सबैभन्दा बढी २०८२ जेठमा २९ थान मुद्दा फैसला गरेको छ । कात्तिक र फागुनमा सबैभन्दा कम दुई/दुई थान मात्र मुद्दा फस्र्योट अदालतले गरेको छ । विचाराधीन मुद्दामध्ये ६ महिनाभित्रका ७१ थान र ६ महिना नाघेका मुद्दा ११ थान रहेका छन् ।