• २५ चैत २०८१, सोमबार

हङकङ जाने क्रिकेट टोलीको बिदाइ

blog

बिदाइपछि नेपाली टोली । तस्बिर सौजन्य : क्यान

काठमाडौँ, चैत २५ गते । हङकङमा यही अप्रिल ९ देखि २३ तारिखसम्म सञ्चालन हुने अन्तर्राष्ट्रिय टी–२० सिरिज खेल्ने नेपाली राष्ट्रिय क्रिकेट टोलीको बिदाइ गरिएको छ । 

नेपाल क्रिकेट सङ्घ (क्यान) का उपाध्यक्ष रोशनकुमार सिंह, प्रवक्ता छुम्बी लामालगायतले टोलीको बिदाइ गर्नुभएको हो । नेपालका नवनियुक्त प्रशिक्षक स्टुआर्ट ल नेपाल आइनपुगेकोले सिरिजमा नेपाली टोलीको प्रशिक्षण पूर्व कप्तान ज्ञानेन्द्र मल्लले सम्हाल्नु हुने छ ।

क्यानले शनिबार मात्र बन्द प्रशिक्षणमा रहेका खेलाडीबाट अन्तिम १४ सदस्यीय टोलीको घोषणा गरेको थियो। रोहित पौडेलको कप्तानीमा रहेको टोलीमा लोकेश बम, साहब आलम, बसिर अहमद र नन्दनकुमार यादवले पुनरागमन गर्नुभएको छ ।

यस सिरिजमा आयोजक हङकङसहित नेपाल, कतार र कुवेतले प्रतिस्पर्धा गर्नेछन् । नेपालले ९ तारिख कतारसँग खेल्दै सिरिजको सुरुवात गर्नेछ । यस्तै नेपालले दोस्रो खेल अप्रिल १० मा कुवेत र तेस्रो तथा अन्तिम खेल अप्रिल १२ मा हङकङसँग खेल्ने छ ।

लिग चरणको शीर्ष दुई टोलीबिच फाइनल भिडन्त हुने छ । अन्तिममा दुई टोलीले तेस्रो स्थानका लागि खेल्ने छन् । 

नेपाली टोली 

रोहितकुमार पौडेल (कप्तान), कुशल भुर्तेल, आसिफ शेख, दिपेन्द्रसिंह ऐरी, ललित राजवंशी, लोकेश बम, बसिर अहमद, सोमपाल कामी, करण केसी, नन्दन यादव, रिजन ढकाल, गुलसन झा, कुशल मल्ल र शाहब आलम ।