काठमाडौँ, चैत २३ गते । पोखरा थन्डर्सले नेपाल सुपर लिग (एनएसएल) मा पहिलो जित निकालेको छ । त्रिपुरेश्वरस्थित दशरथ रङ्गशालामा शनिबार भएको खेलमा पोखराले बलियो काठमाडौँलाई २–० गोलले हरायो ।
पोखराको जितमा विदेशी खेलाडी स्टेफन समीर बिनोङ र सुदील राईले गोल गर्नुभयो । बिनोङले २५औँ मिनेटमा साइददोस्तोन जाफरोभको पासमा उत्कृष्ट हेडगोल गर्दै पोखराको उत्साह जगाउनुभएको थियो ।
३८औँ मिनेटमा बिनोङले पेनाल्टीको अवसर गुमाउँदा पोखरा केही निराश देखिएको थियो । तर, ५९औँ मिनेटमा सुदीलले आयुश घलानको पासमा पोस्ट् छेउबाट गोल गर्दै पोखराको अग्रता दोब्बर बनाउनुभएको थियो । बिनोङ प्लेयर अफ दि म्याच हुनुभयो ।
बल पोसेसनमा अब्बल देखिएको काडमाडौँको गोल फर्काउने प्रयास अन्तिमसम्म सफल हुन सकेन । काठमाडौँका दुई वटा उत्कृष्ट प्रहार बारमा लागेर फर्किएको थियो ।
तेस्रो खेलमा आएर पहिलो जित निकालेसँगै पोखराले तीन अङ्क बनाएको छ । पहिलो हार खेपेको काडमाडौँको समान खेलबाट दुई अङ्क छ ।
