शान्ता अधिकारी
चितवन, चैत २२ गते । भरतपुर महानगरपालिका प्रमुख रेनु दाहालले भरतपुर महानगरले उल्लेख्य प्रगति गरेको बताउनुभएको छ । उहाँले महानगरले अल्पकालिन, मध्यकालिन र दीर्घकालिन महत्वका योजनाहरु एक साथ अघि बढाएको पनि उल्लेख गर्नुभएको छ ।
महानगरपालिकाले शुक्रबार आयोजना गरेको आर्थिक वर्ष २०८१-०८२ दोस्रो चौमासिक सार्वजनिक सुनुवाई कार्यक्रममा राखिएका जनजिज्ञासाको उत्तर दिँदै महानगर प्रमुख दाहालले त्यस्तो उल्लेख गर्नुभएको हो ।
सहभागीहरुले सोधेका प्रश्नमा उहाँले अबको बाँकी कार्यकालमा धेरै कामहरु सम्पन्न गरिने प्रतिवद्धता जनाउनुभयो । उहाँले महानगरले संघीय सरकार, प्रदेश सरकारद्वारा रकम विनियोजित आयोजनाहरुलाई समेत आफ्नो मुख्य काम र गौरबका आयोजनाको रुपमा लिएर कामलाई प्राथमिकतामा राखेको पनि बताउनुभयो । उहाँले आम नगरवासीलाई सम्बोधन गर्दै भन्नुभयो, "सबैलाई सन्तुष्ट बनाउने प्रयासमा महानगर अघि बढेको छ ।"
महानगर प्रमुख दाहालले महानगरमा साझेदार निकाय, संघीय सरकार र प्रदेश सरकारद्वारा सञ्चालित विकास निर्माणका कामहरूमा गुणस्तरलगायत कुनै पनि कुरामा गुनासो नआउने गरी काम गर्न निर्देशन दिनुभयो ।
कार्यक्रममा बोल्दै भरतपुर महानगरका उपप्रमुख चित्रसेन अधिकारीले महानगर योजनावद्ध र सन्तुलित विकासको नीतिलाई अवलम्बन गर्दै दिगो र आत्मनिर्भर विकासको पक्षमा काम अगाडि बढाइरहेको बताउनुभयो । शिक्षा, स्वास्थ्य, कृषि, पर्यटन, सामाजिक सुरक्षा र सुशासन कायम गर्दै अगाडि बढिरहेको बताउँदै उहाँले यसलाई कायम गर्न महानगरवासीको रचनात्मक सुझाव र खबरदारी निरन्तर रहनु पर्ने बताउनुभयो ।
बजेट खर्चमा ३६.४ प्रतिशत प्रगति
महानगरपालिकाले शुक्रबार आयोजना गरेको आर्थिक वर्ष २०८१-०८२ दोस्रो चौमासिक प्रतिवेदनमा बजेट खर्चतर्फ ३६.४ प्रतिशत प्रगति भएको उल्लेख छ । दोस्रो चौमासिक सार्वजनिक सुनुवाई कार्यक्रममा प्रमुख प्रशासकीय अधिकृत लक्ष्मीप्रसाद पौडेलले आफ्नो प्रतिवेदन उक्त कुरा उल्लेख गर्नुभएको हो ।
महानगरले आव २०८१-०८२ मा छ अर्ब ५६ करोड एक लाख ४३ हजार रुपिंयाँ आम्दानीको लक्ष्य रोखेकोमा संघीय सरकार वित्तिय हस्तान्तरणबाट एक अर्व २३ करोड २७ लाख ३९ हजार ४४५ रुपिंयाँ, प्रदेश सरकारबाट तीन करोड ७९ लाख सात हजार ७५० रुपिंयाँ, राजश्व वाँडफाँड रकममध्ये ५७ करोड पाँच लाख ५६ हजार ९४ रुपियाँ र आन्तरिक आय तर्फ गत वर्षको बैक मौज्दात सहित रकम ८१ करोड ८० लाख प्राप्त भएको प्रतिवेदनमा उल्लेख छ ।
समग्र बजेटमा एक अर्व ९९ करोड २५ लाख १० हजार एक सय रुपिंयाँ खर्च भएको छ । जुन समग्रमा बजेटको ३६.४९ प्रतिशत प्रगति हो । चालु बजेटतर्फ दुई अर्ब ७३ करोड ५२ लाख ६२ हजार ९०५रुपिंयाँँ विनियोजित भएकोमा दोस्रो चौमासिकको अवधिमा एक अर्व ३५ करोड ९७ लाख ३५ हजार ९१८ रुपैया खर्च भएको छ । जुन चालु तर्फको समग्र बजेटको ४९.७१ प्रतिशत हो ।
पुँजिगत बजेट तर्फ दुई अर्ब ७२ करोड ४८ लाख ८० हजार ४१ रुपिंयाँ विनियोजन भएकोमा दोस्रो चौमासिक अवधिमा ६३ करोड २४ लाख ६३ हजार पाँच सय रुपिंयाँ खर्च भएको छ । जुन समग्र पुँजिगत बजेटको २३.२१ प्रतिशत हो ।
प्रमुख प्रशासकीय अधिकृत पौडेलले प्रस्तुत गर्नु भएको प्रतिवेदनमा आव २०८१-०८२ का लागि एक अर्व ८० करोड रुपिंयाँ राजस्व संकलनको प्रक्षेपण गरिएकोमा दोस्रो चौमासिकसम्म आइपुग्दा ७७ करोड १७ लाख ५४ हजार १७३ रुपिंयाँ राजस्व संकलन गरिएको र यो वार्षिक लक्ष्यको ४३ प्रतिशत रहेको जानकारी दिनु भएको छ ।
महानगरले आव २०८१-०८२ मा छ अर्ब ५६ करोड एक लाख ४३ हजार रुपिंयाँ आम्दानीको लक्ष्य रोखेकोमा संघीय सरकार वित्तिय हस्तान्तरणबाट एक अर्व २३ करोड २७ लाख ३९ हजार ४४५ रुपिंयाँ, प्रदेश सरकारबाट तीन करोड ७९ लाख सात हजार ७५० रुपियाँ, राजश्व वाँडफाँड रकम मध्ये ५७ करोड पाँच लाख ५६ हजार ९४ रुपियाँ र आन्तरिक आय तर्फ गत वर्षको बैक मौज्दात सहित रकम ८१ करोड ८० लाख प्राप्त भएको प्रतिवेदनमा उल्लेख छ ।
महानगरले गौतम बुद्ध अन्तर्राष्ट्रिय रंगशाला, महानगरको प्रशासकीय भवन, पुंगी खोला र केरुङ्गा घोल सौदर्यकरण, सिटीहल निर्माण, छ लेन सडक, देवघाटको विद्युतीय शवदाह गृह, महानगरीय चक्रपथ, खुल्ला चिडियाखाना, निकुञ्ज क्षेत्रको फाउण्डेशनसहितको मेस जाली, फोहर मैला व्यवस्थापन, उज्ज्यालो भरतपुर कार्यक्रमसमेत लाई मुख्य प्राथमिकता र गौरबको आयोजनाको रुपमा ग्रहण गरेको उक्त अवसरमा जानकारी दिइएको थियो ।
संघ र प्रदेश सरकारको लगानी भएका आयोजनाहरुसमेत महानगरले स्वामित्व ग्रहण गरि काममा तीब्रता दिन सम्बन्धित निर्माण कम्पनीलाई ताकेता गरिरहेको र महानगरले निर्माण कम्पनीलाई सहजीकरण गरिरहेको महानगर प्रमुख दाहालले बताउनुभयो ।
